Ginulat ni Coco Martin ang lahat sa Parade of Stars ng 45th Metro Manila Film Festival na naganap sa Taguig City, kahapon, December 22.
Ito ay dahil ang kanyang Paloma character sa Ang Probinsyano at 3Pol Trobol: Huli Ka Balbon ang nasilayan ng publiko.
Kahit in character si Coco sa Metro Manila Film Festival parade, ang Cardo—ang pangalan niya sa Ang Probinsyano—ang isinisigaw ng mga tao.
Ngayong umaga, December 23, muling magkakaroon ng motorcade sa City of Manila si Coco at ang cast ng 3Pol Trobol: Huli Ka Balbon.
Makakasama ni Coco sa motorcade ang kanyang co-stars na sina Ai-Ai delas Alas, Jennylyn Mercado, at si Manila City Mayor Isko Moreno na may special participation sa kanilang pelikula.
Alas-otso ng umaga ang call time ng mga artista ng 3Pol Trobol at sa City Hall ng Maynila ang meeting place nila.
Magsisimula ng 9 A.M. mula sa City Hall ang motorcade na iikot sa Maynila.
Kaya magkakaroon ng pagkakataon ang mga Manileño na makita nang personal ang mga artista ng 3Pol Trobol.
This time, as himself na si Coco, hindi na si Paloma na popular character niya sa Ang Probinsyano at muling binuhay sa ilang eksena ng kanyang filmfest entry.
Ang magaganap na motorcade ngayong umaga ang pangalawang beses na nagkaroon si Coco ng sariling parada dahil ginawa na niya ito noong 2017 nang maging official entry ang Ang Panday sa 43rd edition ng Metro Manila Film Festival.