Balik-telebisyon ang veteran at multi-awarded actress na si Gloria Romero makalipas ang apat na buwang pamamahinga.
Ngayong December 30, Lunes, ang unang araw ng taping ni Gloria para sa Daig Kayo ng Lola Ko, ang Sunday drama-fantasy anthology show niya sa GMA 7.
Apat na buwang hindi napanood sa Daig Kayo ng Lola Ko ang 86-year-old actress, na sinumpong ng vertigo kaya pinayuhan siya ng kanyang doktor na magpahinga.
Si Nova Villa ang pansamantalang pumalit kay Gloria sa role nito bilang lola sa top-rating program ng GMA 7.
Para maging komportable si Gloria, napagdesisyunan ng production staff ng Daig Kayo ng Lola Ko na kunan ang lahat ng mga eksena niya sa kanyang tahanan sa New Manila, Quezon City.
Tiyak na ikatutuwa ng mga tagahanga ni Gloria at ng loyal viewers ng Daig Kayo ng Lola Ko ang balitang magaling na siya at handa nang magtrabaho.
Ikagagalak din ng mga sumusubaybay sa Daig Kayo ng Lola Ko na extended ito hanggang sa first quarter ng 2020.
A few months back, napabalitang magwawakas na ang Daig Kayo ng Lola Ko ngayong Disyembre dahil papalitan ito ng Agimat ng Agila, ang comeback project ni Senator Bong Revilla Jr. sa home studio nito na posibleng magsimula sa February 2020.