Bumuhos ang mga dasal at get-well-soon messages para kay Christopher de Leon, ilang minuto matapos ang kanyang pag-amin ngayong gabi, Marso 17, na nagpositibo siya sa COVID-19.
Si Christopher, 63, ang kauna-unahang showbiz personality na umaming afflicted siya ng coronavirus.
Dahil sikat na artista, marami ang hindi makapaniwala. Nakalimutan yata nilang tao lamang si Christopher na nagkakasakit, at hindi ligtas sa COVID-19, kahit ano ang gawing pag-iingat.
Tama ang desisyon ni Christopher na ipaalam sa publiko ang kanyang kalagayan dahil nabigyan ng babala ang mga taong nakasalamuha niya sa mga nakaraang araw.
Mabilis na nakarating sa Love Thy Woman co-stars ni Christopher ang malungkot na balita, kaya kumonsulta agad sila sa kanilang mga doktor.
Mag-self-quarantine ang payo ng mga doktor.
Ayon sa Centers for Disease Control and Prevention, dalawa hanggang labing-apat na araw pagkatapos ng exposure ang incubation period ng novel coronavirus.
Nag-taping ang cast para sa mga eksena ng ABS-CBN series na Love Thy Woman noong nakaraang linggo, kaya gumawa agad sila ng precautionary measures nang isiwalat ngayon ni Christopher na positibo ito sa COVID-19.
Sina Kim Chiu, Xian Lim, Eula Valdes, Zsa Zsa Padilla, Sunshine Cruz, Ruffa Gutierrez, at Yam Concepcion ang ilan sa mga artista ng star-studded cast ng Love Thy Woman.