Hinarana ng mga empleyado ng The Medical City ang mga frontliners—ang health workers—na naka-assign sa COVID-19 Response Unit.
Ang head nurse ng ospital na si Alexis Agacite Mago ang nag-post sa kanyang Facebook page ng madamdaming video.
Ilan sa mga inawit ng mga empleyado ay ang "Pagsubok" ng Orient Pearl at "Fight Song" ni Rachel Platten.
Ang harana ay isang paraan para hindi panghinaan ng loob ang medical personnel, na ginagawa ang lahat para hindi kumalat ang COVID-19 at para gumaling ang mga pasyenteng nagpositibo sa virus.
"May God keep you safe and healthy."
"Huwag kayong magpatalo sa virus na iyan."
"Laban lang!”
Ito ang ilan sa mga encouraging na message naman ng netizens sa frontliners.
Sa statement na inilabas ng The Medical City noong March 23, kinumpirma ng management na 137 ang bilang ng frontline workers nilang naka-quarantine, dahil sa exposure sa COVID-19 patients.
Ang The Medical City ang isa sa mga ospital sa Metro Manila na lumampas na sa kapasidad ang mga inaalagang pasyente na positibo sa COVID-19.
Kaya humingi sila ng pang-unawa mula sa publiko.
Bahagi ng public advisory ng ospital: "We do not wish at all to turn you away, but the reality is that we can no longer provide your loved ones the care that they need.
"Your own initiative to look for other hospitals is appreciated."