Nagluluksa ang mga mamamayan ng Jala-Jala, Rizal dahil sa pagpanaw ng kanilang vice mayor na si Jose "Jolet" Delos Santos ngayong Martes, March 31.
COVID-19 ang sanhi ng kamatayan ni Delos Santos.
Nakapanayam pa ng 24 Oras si Delos Santos noong March 26, Huwebes.
Sa report ni Emil Sumangil, sinabi ni Delos Santos na nagkasakit siya matapos dumalo sa Philippine Councilors League (PCL) convention.
Ginanap ito sa SMX Convention Center sa Pasay City noong February 26 at February 27, 2020.
Ang convention ay dinaluhan din ng isang konsehal mula sa Negros Oriental na namatay din dahil sa coronavirus disease.
Sabi ni Delos Santos sa panayam ng 24 Oras, “Hindi ko alam kung saan ko nakuha 'yan, kung sa PCL, sa national, or dito sa piyesta na naganap sa aming barangay.
“Okay naman ako sa ngayon. Nagpapagaling ng ubo't sipon, konti na [lang]..."
Pagbibigay-assurance pa niya sa kanyang mga kababayan, "Huwag kayo mag alala."
Pero makalipas ang limang araw, binawian na siya ng buhay.