Trivia: March 17, 2018 nang ipalabas ang huling episode ng Ika-6 Na Utos, ang afternoon drama series ng GMA-7 na sinubaybayan at sinuportahan ng publiko.
Isang taon at tatlong buwan itong napanood sa telebisyon.
Makalipas ang dalawang taon, nitong March 18, 2020, muling ibinalik ng GMA-7 ang Ika-6 Na Utos.
Ito ang pansamantalang ipinalit sa Magkaagaw habang ipinatutupad ang Enhanced Community Quarantine sa Luzon.
Tumatak nang husto sa manonood ang Georgia character ni Ryza Cenon sa Ika-6 Na Utos.
Kaya hanggang ngayon, natatandaan nila ang role niyang naging usap-usapan noon.
Marami ang natuwa nang muling mapanood si Ryza sa dating home network niya, bago siya nagdesisyong lumipat sa Viva Artists Agency at nabigyan ng ABS-CBN ng sunud-sunod na television assignments.
"Nakakatuwang mapapanood na naman nila si Georgia, at kahit papaano, maaaliw uli yung mga kababayan natin habang nasa bahay sila," reaksiyon ni Ryza sa rerun ng Ika-6 Na Utos.
Walang ipinagkaiba si Ryza sa lahat ng mga artista na nagkaroon ng mahabang bakasyon dahil sa Enhanced Community Quarantine.
Plano sana ni Ryza na maging volunteer para makatulong sa mga kababayang apektado ng COVID-19, pero ang kapakanan ng kanyang lola ang inaalaala niya.
Saad ng Kapamilya actress, "Gusto kong mag-volunteer or tumulong at mamigay sana sa frontliners at street vendors, kaya lang mahirap para sa akin ang lumabas ng bahay dahil kasama ko ang lola ko.
"Baka hindi ko mamalayan may naiuwi na pala ako na virus.
"Yun ang iniiwasan ko, kaya magdo-donate na lang ako para sa frontliners at sa ibang mga nangangailangan ng tulong."