Pinatunayan ng isang kababayan natin sa Hanoi, Vietnam, ang katatagan at husay sa diskarte ng mga Pilipino.
Nawalan ng trabaho bilang kindergarten school teacher si Julie Villanueva, 41, nang ipatupad ng Vietnamese government ang lockdown sa buong bansa dahil sa coronavirus pandemic.
April 1 nang magsimula ang lockdown sa Vietnam, pero January pa lang, hindi na nakapag-report sa trabaho si Julie.
Tubong-Marikina si Julie, single parent, at may tatlong anak na lalaki, na kambal ang dalawa.
“Eight years na po ako sa Vietnam. Dati, sa Ho Chi Minh City ako, pero ngayon, sa Hanoi na ako at five years na ako dito," pakilala ni Julie nang makausap namin via Facebook messenger kanina, April 25.
“Wala po akong work simula noong January 22 dahil sa Chinese New Year holiday, then hindi na nag-resume ang klase namin dahil sa COVID-19 outbreak sa Vietnam."
Kuwento pa ni Julie, hindi siya nawalan ng pag-asa dahil naghanap siya ng ibang mapagkakakitaan.
Ito ay para hindi siya magutom at hindi rin matulad sa ibang Pilipino sa Vietnam na tinulungan ng Philippine government makauwi na sa Pilipinas.
Ang paggawa ng Filipino breads ang naisip ni Julie na temporary source of income habang hindi pa bukas ang mga eskuwelahan.
At dahil walang background sa baking, ang Google ang kanyang naging sandigan.
“Nag-aral lang ako ng recipe ng mga tinapay sa Google noong March 22, 'tapos in-adjust ko para makuha ko ang perfect recipe.
“Noong una, bake-bake lang para sa mga kasama ko, hanggang marami na ang umo-order na mga kakilala ko.
“Nag-post din ako sa Hanoi Groups sa Facebook at lalong dumami ang orders.
"Every day, up to 150 breads lang ang quota ko kasi masyado nang dumarami ang order na dine-deliver ko via Grab.
"Pwede rin COD o bank transfer sa account ko.
“Pati mga Vietnamese, nag-o-order na rin dahil nasarapan sila sa Pinoy breads.
"Magtayo na raw ako ng bakery dahil malasa raw ang mga tinapay na ginagawa ko.
"Walang lasa kasi ang mga tinapay sa Vietnam. Ngayon lang yata sila nakatikim ng may flavor.
“Yung mga Pinoy naman, gustung-gusto nila dahil it feels like home daw."
Puwede na raw sana siyang umuwi ng Pilipinas kung gugustuhin niya, pero pinili niyang manatili sa Hanoi.
Prangka namang sinabi nitong natatakot siya sa maraming kaso ng COVID-19 sa ating bansa.
Mga tinapay na paborito raw ng mga Pilipino ang ginagawa at ibinebenta niya.
Katulad ng pandesal, ube pandesal, pan de coco, Spanish bread, at cheese ensaymada.
Wala kasing mga nabibili na Philippine bread sa Vietnam.
“Lahat po ng breads ko, in demand. Pinakamabenta ang Spanish bread, pan de coco, at pandesal.
"Gumawa na rin ako ng ube pandesal dahil nakita ko na yun ang uso ngayon sa Pilipinas."
Ani Julie, araw-araw ay kumikita siya ng katumbas sa PHP3,000, na malaking bagay para sa limang oras lang na paggawa niya ng mga tinapay.
Simula noong Huwebes, April 23, lifted na ang lockdown sa Vietnam dahil nakontrol na ang pagkalat ng COVID-19 kaya magbubukas na ang mga klase sa May 4.
Kahit nakahanap ng ibang mapagkakakitaan, walang plano si Julie talikuran ang pagtuturo sa Vietnamese kindergarten students.
At kung ipagpapatuloy niya ang paggawa ng Filipino breads, baka tuwing weekends na lamang.
POSTSCRIPT: Nineteen years old na ang kambal na anak ni Julie at eleven years old ang kanyang bunso na magkaiba ang mga ama.
Kung may epekto ang coronavirus pandemic sa buhay ni Julie, ito ay ang naudlot na annual summer vacation sa Hanoi ng kanyang bunsong anak.
“Yung kambal, kasama ang daddy nila na first husband ko, pero may asawa na rin at kambal din ang anak nila na parehong babae.
“Yung bunso ko, iba ang tatay, at sa Pilipinas siya nag-aaral.
"Video call na lang lagi ang conversation namin ni Bunso dahil na-cancel ang flight niya nang magkaroon ng COVID-19 outbreak. Every summer, kasama ko siya.”
Hindi ba mahirap na malayo siya sa mga anak niya?
Sagot ni Julie, “Sabi ng kambal, kukunin daw nila ako kapag may work na sila pero okey naman ako dito sa Hanoi. Sabi ko, visit na lang nila ako.
“Pumayag ako na kunin sila ng tatay nila kasi gusto ko na maging maganda ang future nila.
"Sa 'grand finals' na lang kami magkita-kita.
“Saka nag-send sa akin ng letter ang Australian Embassy. Hiningi ang consent ko bago i-grant ang citizenship ng mga anak ko,” ang pahayag pa ni Julie na malaki ang kontribusyon para makilala ng mga Vietnamese sa panahon ng COVID-19 ang mga tinapay na gawa at tatak-Pilipino.