Simula ngayong gabi, May 8, mapapanood mula 6:00 P.M. ang TV Patrol, ang primetime news program ng ABS-CBN.
Nakatigil man ang broadcast operations ng ABS-CBN, muling nagbalik ang TV Patrol sa mga social media platform ng ABS-CBN kagabi, May 7.
Sabay ang live streaming sa kanilang exclusive streaming app na iWant at sa cable channel na ANC.
Isang araw na nagpahinga ang TV Patrol matapos ang cease and desist order ng National Telecommunications Commission noong May 4.
Pero hindi lamang ang online edition ng TV Patrol ang mapapanood sa 6 p.m. timeslot.
Dahil umpisa ngayong gabi, May 8, magsisimula rin ng 6 P.M. ang 24 Oras, ang primetime news program ng GMA-7.
Noong Lunes, May 4, halos tatlong oras na umere ang 24 Oras dahil nagsimula ito ng 6:25 P.M. at natapos ng 8:56 P.M.
Noong Martes, May 5—ang gabi na nag-sign off ang ABS-CBN—halos dalawang oras na napanood ang primetime news program ng Kapuso Network.
Matalas ang pakiramdam at paniningin ng televiewers dahil sila ang nakapansin tungkol sa magkasabay na oras na pagsisimula at pagtatapos ng TV Patrol at 24 Oras.
Ganoon na raw talaga bago pa ipinatupad ang enhanced community quarantine noong Marso.
Isang patunay na buhay na buhay ang kumpetisyon sa pagitan ng mga nabanggit na programa na pareho ang misyon—ang mapaglingkuran ang mga Pilipino sa pamamagitan ng mga balitang kanilang inihahatid.