"Insensitive" ang paratang ng beauty pageant fans sa Binibining Pilipinas Organization dahil sa simplified explanation nito tungkol sa first wave at second wave ng coronavirus pandemic.
Naging malaking isyu ang lagay ng COVID-19 sa bansa dahil sa premature announcement ni Department of Health Secretary Francisco Duque na "second wave na ng COVID-19 infections ang nararanasan ng ating bansa.
Mariin itong kinontra at kinuwestyon ng mga senador at ng ibang government officials.
Hindi pa naman daw na-flatten ang curve ng bilang ng COVID-19 cases para masabing lumampas na ang bansa sa first wave ng pandemya.
Kaugnay nito, nag-repost ang Binibining Pilipinas Organization ng meme na nagpapakita ng analogy sa isyu.
Inihaluntulad ang status ng COVID-19 sa bansa sa mga nasungkit na Miss Universe crowns ng Pinay beauty queens.
Makikita sa photo collage ang litrato nina Miss Universe 2015 Pia Wurtzbach, Miss Universe-Philippines 2016 Maxine Medina, Miss Universe-Philippines 2017 Rachel Peters, at Miss Universe 2018 Catriona Gray.
Sabi sa caption ng Facebook post ng Bb. Pilipinas Organization: "According to pageant fans, this is how you ride the wave."
Kung susuriin ang meme, si Pia raw ang simbolo ng "FIRST WAVE."
Sina Maxine at Rachel—na kapwa talunan sa Miss Universe 2016 at 2017— matatawag na "FLATTENING THE CURVE.”
Si Catriona naman daw ang simbolo ng "SECOND WAVE" nang manalo ito sa Miss Universe.
NETIZENS REACT
Kung nagpapakuwela man ang Bb. Pilipinas Organization, hindi ito nagustuhan ng netizens.
Marami ang nainsulto sa reposted meme dahil pagmamaliit ito diumano sa kakayahan at pagkatao nina Maxine at Rachel nang maging kinatawan sila ng Pilipinas sa Miss Universe.
"Bad joke, rude, poor taste, inappropriate, at offensive for Maxine and Rachel" ang ilan sa mga reklamo ng mga tao.
Umapela pa ang iba na sana ay tanggalin daw ng Bb. Pilipinas Organization ang Facebook administrator na siyang nag-post ng meme.
May akusasyon din sila na nagagawa na ng Bb. Pilipinas Organization na paglaruan ang Miss Universe dahil iba na ang franchise holder ng Miss Universe Philippines.
Sa kabilang banda, may mga natawa rin naman sa Facebook post ng Bb. Pilipinas Organization.
Tinawag nila na "clever, funny, at witty" ang meme tungkol sa kung ano ang ibig sabihin ng terms na "first wave, flattening the curve at second wave" ng COVID-19 pandemic.
Kaya wala raw dahilan para i-delete ito sa Facebook page ng Bb. Pilipinas.
Iyon nga lang, taliwas sa women empowerement advocacy nito ang panlalaglag sa former Bb. Pilipinas-Universe titleholders na hindi nagtagumpay sa Miss Universe.
BB. PILIPINAS DELETES POST
Dahil sa mga batikos at reklamo mula sa netizens, burado na sa official Facebook page ng Bb. Pilipinas ang offensive repost.
Pinakinggan nila ang panawagan ng concerned citizens na inalmahan ang diumano’y hindi makatarungang trato kina Maxine at Rachel, para lang maipaliwanag sa publiko sa nakakainsultong paraan ang first wave, flattening of the curve, at second wave ng coronavirus pandemic situation sa Pilipinas.