Ang madalas na pagbibiro ni Joey de Leon sa Eat Bulaga! na magsasara na ang Klownz at Zirkoh ang naalaala ng netizens nang maiulat na hanggang July 29 na lamang ang operasyon ng mga comedy bar na pag-aari ni Allan K.
Unang itong naiulat sa PEP.ph (Philippine Entertainment Portal) nitong umaga ng Martes, June 30.
Maraming beses na nagbiro si Joey kay Allan tungkol sa pagsasara ng Klownz at Zirkoh.
Kaya maging maingat sa pagbibitaw ng salita, ang paalaala ng netizens, dahil posibleng magkatotoo ito.
Nagsara ang Klownz at Zirkoh nang ipatupad ni President Rodrigo Duterte ang enhanced community quarantine noong March 15, 2020.
Daan-daang libong piso ang monthly rental ni Allan sa Klownz at Zirkoh.
Ang siste, prerogative ng mga building owner kung maniningil sila ng upa, kahit tatlong buwan nang sarado at walang kita ang mga negosyante.
Sa kaso ni Allan, patuloy ang pagbabayad niya ng renta nitong nakalipas na three and a half months na nakasara ang comedy bars.
Dahil sa kawalan ng kita, nagdeklara na siya ng bankruptcy.
Sa kabila ng malungkot na pangyayari, umaasa ang mga empleyado ng Klownz at Zirkoh na magbubukas ng negosyo si Allan kapag natapos na ang malaking problemang dala ng coronavirus pandemic.
Isang insider ang nagsabi sa Cabinet Files: Hangga’t walang ibang negosyante na uupa sa lugar na kinatatayuan ng Zirkoh sa Tomas Morato Avenue, Quezon City, puwede itong balikan at rentahan ni Allan K.
Ito ay sakaling magdesisyon ang comedian-host na muling buksan ang comedy bars, na labing-anim na taon naghatid ng kaligayahan sa mga parokyano.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika