Ibinalita ni Angelu de Leon ang posibilidad na muli silang magtambal ni Bobby Andrews sa muling pagbabalik ng aktres sa bakuran ng Viva.
Ang love team nina Bobby at Angelu ang isa sa mga sikat at tinitilian noong dekada ’90, kaya umaasa ang kanilang mga tagahanga na magkakaroon ng on-screen reunion ang dalawa.
Ang tagumpay ng tambalan nila ni Bobby ang dahilan kaya tinanong si Angelu kung sino sa mga magkakapareha ngayon ang sumusunod sa love team nila noon.
Ayon sa aktres, "Parang I’m not in the position to say, pero makikita mo naman, most of the fans, they’re the ones who will really tell you kung sino.
"Sometimes, you’ll hear, it’s KathNiel. Sometimes we hear… iba-iba.
"Seeing love teams now, it's totally different from our time, kasi ngayon talagang sila real, real na real."
Halos magkakaedad ang mga love team ngayon, at ito ang nakikita ni Angelu na kaibahan dahil sa age gap nila ni Bobby noong namamayagpag ang kanilang tambalan.
"I think ang fortunate lang... Bobby, huwag kang magalit sa akin, ang fortunate lang ngayon, ang magkaka-love team ngayon, halos magkakaedad!" natawang sabi ni Angelu.
“Sorry, ha, I love you Bob, kasi yun talaga ang difference namin with Bob. Maybe it would have been a different situation if our age were a bit closer because talagang there was really age gap."
Tatlong taon ang agawat ng edad nina Bobby, 44, at Angelu, 41.
Patuloy ng aktres, "It was a factor.
"At least yung love teams ngayon, makikita mo na they really fall in love with each other.
"Merong nagpaubaya... ang cute, naaliw ako doon. Parang sabi ko, dapat ginawa namin ‘yon!"
Ang tinutukoy ni Angelu na "nagpaubaya" ay ang dating magka-love team at magkasintahang sina Joshua Garcia at Julia Barretto, na tampok sa music video ni Moira dela Torre na "Paubaya."
ANGELU'S CONTENTMENT
Sa edad na 41, tahasang sinabi ni Angelu na kuntentong-kuntento na siya dahil sa kanyang asawa, mga anak, at sa mga nangyayari sa career niya.
Pahayag niya, "I cannot even begin to imagine na sa lahat ng mga pinaggagawa ko noon, ito yung magiging buhay ko ngayon.
"I mean, if it was only up to me, I don’t know, but it’s really God’s grace na I’m in this position.
"I have a husband. I have beautiful children. I have a career, and I’m back at Viva.
"Sabi ko nga, ito yung dream full circle na’to. That’s why minsan sasabihin natin, all things will come for the good talaga.
"I’m very happy because my children are flourishing with their studies, I have a good husband, thank you Lord."
Dagdag ni Angelu, "Inspite of all these things naman, I’m still grateful that I have a career that I love to do and I’m still, in a sense, you know, that feeling na you’re still wanted.
"Sobrang thankful lang ako when Viva started talking to me about this co-management and going back to Viva.
"Parang, sobrang wow, talagang sobrang grateful ka lang."