May mga nag-akalang lilipat si Sarah Geronimo sa TV5 at siya ang magiging host ng PoPinoy.
Ito ay dahil sa teaser ad ng TV5 na "Pop-Siklaban Na!" na may litrato ni Sarah, at may caption na "PoPahuli ba kayo? Don’t miss this chance. The Popstar Royalty is rooting for you!"
Ang PoPinoy ang search ng TV5 para sa "biggest Pop Boyband" at mapapanood ito simula sa April 2021.
Si Sarah ang ambassador ng isang cellular service company na major sponsor ng PoPinoy kaya ginamit ang litrato niya para sa teaser ad ng upcoming program ng Kapatid network.
May exclusive contract si Sarah sa ABS-CBN at mapapanood lamang siya sa TV5 dahil sa ASAP, ang musical-variety show na ipinalalabas din sa Kapatid Network tuwing Linggo.
Ang exclusive contract ni Sarah sa Kapamilya Network ang dahilan kaya mapapanood lamang sa sister company nito, ang streaming service na KTX.ph, at sa VivaMax ang Tala, ang kanyang one-night only at exclusive online film concert sa March 27, 2021.
Para sa kaalaman ng fans ni Sarah na na-excite sa lumabas na teaser ad, walang participation ang kanilang idolo sa PoPinoy.
PoPinoy Hosts
Sina Paolo Ballesteros at Maine Mendoza ang mga host ng nabanggit na talent search show.
Ang PoPinoy ang unang show ni Maine sa TV5.
Wala itong conflict sa GMA Network Inc. dahil talent siya ng Triple A, ang talent management company ng APT Entertainment.
Samantalang blocktimer naman sa Kapuso network ang Eat Bulaga, na produksiyon ng TAPE Inc. at regular noontime program ng TV host-actress.