Ngayong Martes, March 2, ang 38th birthday ni Jerald Napoles.
Isa lamang ang kahilingan niya para sa kanyang kaarawan—ang bumalik na sa normal ang takbo ng buong mundo na lubhang naapektuhan ng coronavirus pandemic.
Para sa lahat at hindi pangsarili ang birthday wish ni Jerald dahil nakita at naranasan niya ang malungkot at malupit na epekto ng coronavirus pandemic sa sanlibutan.
"Wish ko talagang bumalik sa dati ang mundo para pati ang mundo, makinabang sa birthday wish ko.
"Gagaan uli ang life for everyone kapag naging okey na ang lahat," pahayag ni Jerald.
'J' not 'G' in his name
May interesting explanation ang aktor tungkol sa letter J at hindi sa nakasanayan na letrang G na umpisa ng kanyang pangalan.
Nang isilang si Jerald noong March 2, 1983, ang tiya at hindi ang mga magulang niya ang nagparehistro ng kanyang pangalan.
"Jellyn Guillen" ang pangalan ng tita ni Jerald.
Lingid sa mga magulang ni Jerald, imbes na letter G, ang letrang J ang ginamit ni Jellyn nang iparehistro nito ang pangalan ng kanyang pamangkin para pareho ang unang letra ng kanilang mga pangalan.
"Si Tita po ay nasa Japan nakatira na. Resident na po siya dun. Japanese passport na.
"Her name po is Jellyn Guillen kaya J ang gusto niya!" natawang kuwento ni Jerald tungkol sa kasaysayan ng spelling ng kanyang pangalan.
"Ipinaubaya na lang ni Mama yung name ko sa kanya since close naman talaga sila.
"Saka okey naman din yung letter J sa Jerald po. Maiba lang. Hehehe!
"Tunog sosyal yata sa kanila yung Jerald kaya ganun dahil ipinanganak lang po ako sa barangay center ng Tondo."
Maraming ipinagpapasalamat si Jerald sa bagong yugto ng kanyang buhay dahil bukod sa matatag na matatag ang relasyon nila ng girlfriend niyang si Kim Molina, regular siyang napapanood bilang hurado ng "Versus," isa sa mga popular segment ng It’s Showtime.
"Masaya po sa It’s Showtime! Di ko ine-expect na kukunin nila ako bilang hurado sa isa sa mga segment.
"Masaya rin pala talaga sila dun. Magkakapamilya talaga ang turingan nila.
"Nakakahawa ang good vibes. Sana tumagal pa ko dun," ani Jerald.