Ang big announcement ng TV5 management tungkol sa mga bagong programang mapapanood sa Kapatid Network ang hinihintay ngayong hapon, March 5.
Pero nauna nang magbalita si Cristy Fermin sa show nito sa Radyo Singko 92.3 na simula sa darating na Lunes, March 8, matutunghayan na rin sa TV5 ang mga prime-time program ng ABS-CBN.
Kabilang dito ang Ang Probinsyano, Ang Sa Iyo Ay Akin, Walang Hanggang Paalam, at Pinoy Big Brother Connect.
Kinumpirma ng isang TV5 insider sa Cabinet Files na totoong mapapanood na sa TV5 ang mga programa ng ABS-CBN, pero hinihintay pa nila ang official statement mula kay TV5 President Robert Galang.
Sa mga programa naman ng TV5, tanging ang Paano ang Pangako? ng IdeaFirst Company at Cignal Entertainment ang patuloy na mapapanood sa primetime slot ng TV5 dahil sa mataas na ratings ng programa.
Ang Sunday noontime musical-variety show na ASAP Natin ‘To ang show ng ABS-CBN na unang napanood sa TV5 noong January 24.
Dahil sa partnership ng TV5 at ABS-CBN, hindi na nakapagtatakang bukod sa Kapamilya Channel at A2Z, ihahatid na rin ng Kapatid Network sa viewers nila ang apat na primetime shows ng Kapamilya station.