Tiyak na mami-miss nina Carla Abellana at Mikael Daez si Coney Reyes dahil masaya raw itong katrabaho.
Magwawakas na kasi sa March 19, 2021 ang Love of My Life, ang Kapuso prime-time series na pinagbibidahan nila.
Si Coney ang gumaganap na Isabella Gonzales, ang matriarch sa Love of My Life. Si Mikael ay gumanap na bunsong anak ni Isabella, habang si Carla ay asawa ng panganay ni Isabella.
Pero kung seryoso at intimidating ang karakter ni Coney sa top-rating drama series ng GMA-7, kabaligtaran ito ng ugali niya sa tunay na buhay dahil masayahin daw ito sa set.
"Sa totoo lang, mahirap matakot sa isang tao na tawa nang tawa," sabi ni Mikael na tuwang-tuwa kay Coney.
"Tita Coney is such a happy person.
"Actually, ang naging problema namin, masyado kaming natutuwa off-cam na kailangan na namin mag-take, nagagalit na yung assistant director namin sa amin."
Hindi naman daw sila kinagalitan ng direktor na si Don Michael Perez.
"Dun na lumalabas yung pasensiya ni Direk kasi nandoon lang si Direk, just waiting for all our good vibes to die down kasi mabigat yung eksena," dagdag ni Mikael.
Intimidating ang unang impression ni Carla kay Coney. Pero nang tumagal ang kanilang pagsasama, natuklasan ni Carla na walang dahilan para matakot siya sa kanyang co-star sa Love of My Life.
"Noong umpisa, I will admit medyo intimidated po. Parang natural kahit papaano na may konting kaba because we don’t know what to expect, how it will turn out. But nawala po kaagad iyon.
"Tama po si Mikael, tawa po nang tawa si Tita Coney, mahilig ho siyang tumawa. Super nakapa-down to earth ni Tita Coney.
"Nawala almost instantly yung intimidating factor and we were so comfortable with her right away, more so nitong pandemic."
Malaking bagay raw na hindi umatras si Coney sa show sa kabila ng banta ng pandemya nang magbalik-lock-in-taping sila noong November 2020.
Patuloy ni Carla, "I am honestly very grateful that Tita Coney had the courage to still be part of the show given that yung kanyang health… siyempre mahirap with the restrictions and also age.
"Hindi talaga kumpleto, hindi maitatawid ang kuwento ng Love of My Life without Tita Coney, her character as Isabella, napaka-crucial po nun."
Ang magandang samahan nila sa set at ang mga positive feedback tungkol sa Love of My Life ang ilan sa mga dahilan kaya gusto nina Carla, Mikael, at Coney na magkaroon ng Season 2 ang kanilang drama series na hindi mabigat sa dibdib panoorin.
Natutuwang sabi pa ni Carla, "We are more than grateful for all the feedback we’ve been receiving, kahit may times na nag-aaway-away ang viewers.
"Nagkakampi-kampihan po sila, and we take that as a compliment."