Kabilang si Vice Ganda sa mga Kapamilya star na lumahok sa pasasalamat ng ABS-CBN na live na naganap ngayong Linggo ng tanghali, July 11, sa ASAP Natin ‘To.
Ipinarating ng ABS-CBN management ang pasasalamat sa lahat ng mga patuloy na sumusuporta sa kanilang network, isang araw matapos gunitain kahapon, July 10, ang unang anibersaryo ng pagpapasara sa Kapamilya station.
Bago kinanta ni Vice ang sariling version niya ng "Ano'ng Nangyari Sa Ating Dalawa," nag-monologue muna siya tungkol sa kanyang paniniwala na nilapastangan ang ABS-CBN nang hindi ito pagkalooban ng franchise kaya nagkawatak-watak ang mga empleyado at artista ng Kapamilya Network.
“Isang taon na ang nakalipas matapos ka nilang lapastanganin, kumusta ka na ba, mahal kong ABS-CBN?” ang malungkot na umpisa ng monologue ni Vice.
“Nakita ko kung paano ka nila sinaktan, kung paano ka nila isinubsob at patuloy na sinisipa habang nakayuko at nakadapa.
“Sa araw na ito, hayaan mong alayan kita ng isang awitin na naisulat ko habang binabalik-balikan ko ang nagdaang isang taon na dumanas ka ng labis na sakit at ngayon ay hinihilom ng pagmamahal at pag-asa.
“Pasintabi kay Ice Seguerra at sa sumulat ng kantang 'Ano'ng Nangyari sa Ating Dalawa,' dahil bahagya ko pong pinalitan ang mga titik ng awitin. Ito ang liham ko sa’yo, mahal kong Kapamilya.”
Ang "Ano'ng Nangyari Sa Ating Dalawa" ang 2013 hit song ni Ice Seguerra ang inawit ni Vice pero pinalitan niya ang lyrics nito para umakma sa kasalukuyan na sitwasyon ng ABS-CBN.
Ikaw ang pinangarap, ikaw ang hanap-hanap ngunit bakit nagbago ang lahat
Liwanag na iyong taglay parang naging salat
Pangako habang buhay pangakong di magwawalay
Kahit lumamig kanilang pagmamahal
Pagbangon mo at paglipad aking idarasal
Anumang mangyari sa ating dalawa
Simula pa noon tayo ay iisa
Hindi kita iiwan hanggang sa huling laban
Sa pagsubok sa ating pagmamahalan
Anumang mangyari sa ating dalawa
Pagmamahal sa’yo’y hindi mag-iiba
Damdamin ay nasasaktan, puso’y nasusugatan
Pangako mong pagmamahal aking susuklian
Sa hirap at ginhawa
Sumpa ko’y sasamahan ka
Kahit ikaw ngayo’y nasasaktan
Ngiti ng iyong tagumpay ay muling makakamtan
Anuman mangyari sa ating dalawa
Simula pa noon tayo ay iisa
Hindi kita iiwan hanggang sa huling laban
Sa pagsubok sa ating pagmamahalan.
Use these Klook promo codes when you shop or order online. Marami pang ibang coupons dito.