Inamin ni Robin Padilla ang balak nitong kumandidato bilang gobernador ng Camarines Norte sa halalan sa Mayo 9, 2022.
Pero nagbago raw ang kanyang isip nang malaman niya ang malaking halagang kailangan para sa kampanya.
Sa panayam sa kanya ng asawang si Mariel Rodriguez-Padilla para sa YouTube channel nito, ipinagtapat ni Robin na nagparehistro na siya sa Camarines Norte dahil sa pinaplano niyang kandidatura.
Lahad ng aktor, “Nagparehistro pa nga ako sa Bicol kasi ang nasa isip ko, P10 million, P20 million, siguro kaya naman utang-utangin ‘yon.
“Twenty million, meron ka naman naitago, hindi naman ako naniniwala na ginastos mo lahat.
“Sinabi sa akin, P150 million [ang kailangan] sa local government, governor. Yun pa daw ang pinakamaliit.
“Sabi ko, 'Teka muna!' Ibig mong sabihin, kung magbebenta ka ng ari-arian para pondohan yung pagkandidato na ‘yon, sabihin na natin na nanalo ka..." may sasabihin pa sana si Robin pero si Mariel na ang nagsalita.
Sundot ng TV personality, “Ako na ang magsasabi. Ang mangyayari, mapipilitan ka talagang maging corrupt kasi babawiin yung bahay.
“Alangang pumayag na lang ako, ibinenta natin yung mga ari-arian natin, tapos nawala na lahat dahil kinampanya natin. O, ba, siyempre kailangan bumalik ‘yon.
"Dun ngayon papasok yung corruption!"
Dahil hindi na matutuloy ang kanyang gubernatorial bid sa Camarines Norte, humingi si Robin ng paumanhin sa kanyang mga kababayan na umasang tatakbo siya sa eleksyon sa susunod na taon.
Saad niya, “Hindi tama, so nagdesisyon na ako.
"Kaya sa mga kababayan po natin sa Camarines Norte, patawarin niyo po ako na hindi ko po kaya.
“Kung gusto ko pong magdala ng pagbabago sa inyo, dapat, umpisa pa lang. Pagpasok ko pa lang, pagbabago na kaagad.
"Hindi yung mangangako ako, ganito, ganito, ganito, bola ‘yon."
MALING AKALA
Sinamantala naman ni Mariel ang pagkakataon para linawin sa lahat na mali ang akala na inuubos niya ang pera ng kanyang asawa.
Sabi ni Mariel, “I-clear natin sa kanila na yung pera ko, pera ko. Yung pera mo, pera mo.
"Pero siya [Robin] ang nagbibigay ng para sa amin dito sa bahay.
"Pero yung mga luho ko, lahat ng mga damit na binibili ko na mamahalin sa mga anak ko. But anything luxury, anything out of the necessity, sa akin ‘yon galing.
“Kasi minsan, sinasabi nila, baka inuubos ko raw yung pera mo.
"Itong mga kalokohan ko, akin ‘yon ‘no! Hello!"