Kabilang ang comedian na si Ate Gay sa mga nagbigay ng testimonya tungkol sa pagkakaroon niya ng mga karamdaman sa panahon ng coronavirus pandemic nang ilunsad ang mWell, ang all-in-one mobile app noong Biyernes, July 23.
Sa kanyang testimonya, binalikan ni Ate Gay ang mga paghihirap na pinagdaanan niya, ang pagkakaroon ng tuberculosis, at ng rare skin disease na toxic epidermal necrolysis.
Ayon sa healthline.com, ang toxic epidermal necrolysis ay isang "rare and serious skin condition." Kadalasan ay adverse reaction ito sa mga gamot gaya ng antivulsants o antibiotics.
Ang pinakasintomas nito ay "severe skin peeling and blistering. The peeling progresses quickly, resulting in large raw areas that may ooze or weep."
Ibinahagi ni Ate Gay ang mga larawan ng katawan niyang sugat-sugat kaya isang tunay na himala ang kanyang paggaling.
Ayon kay Ate Gay, “Nagkaroon ako ng maraming sakit kagaya ng TB, sakit sa balat, yung tinatawag na toxic epidermal necrolysis.
“Nagbabalat yung balat ko mismo, as in pati yung mukha, labi, pati gilagid.
"Naranasan ko ‘yan, ang hirap-hirap, kasi grabe yung naranasan ko.
"Sa sampung tao, dalawa lang kami na may ganoon, natutuklap ang balat ko.
"Kapag inaalalayan ako ng kapatid ko, nalalaglag yung balat ko. Ang hirap!"
Ang paghahanap ng doktor na makapagpapagaling sa kanya at ang malaking halaga ng perang kailangan niya sa pagpapagamot ang naging problema ni Ate Gay.
Pero napatunayan niyang hindi lamang salapi ang importante dahil mas mahalaga ang pagmamahal ng pamilya.
Saad ni Ate Gay, "Hindi ko alam kung saan ako kukuha ng gamot at saan ako kakausap ng doktor.
"Kumbaga, akala ko dati, pera-pera lang. Kapag nagpadala [ng pera], padala na lang. Wala nang pagmamahal.
“Nung nagkasakit ako, dun ko lang naramdaman na mahal pala ako ng mga kapatid ko, pati ng nanay ko."
HEALTH TECHNOLOGY PLATFORM
Nagpapasalamat si Ate Gay dahil sa pamamagitan ng mWell mobile app, hindi na siya mahihirapang humanap ng doktor na mapagtatanungan tungkol sa kanyang mga sakit at ng mga botikang mabibilhan ng mga gamot na kailangan niya.
Kasama ni Ate Gay sina Gabby Concepcion, Pops Fernandez, at Derek Ramsay sa mga nag-endorso sa publiko ng mWell, ang health technology platform na proyekto ng Metro Pacific Health Tech Corporation at subsidiary ng Metro Pacific Investments Corporation na pinamumunuan ng businessman na si Manny V. Pangilinan.
Naniniwala si MVP na malaki ang maitutulong sa mga Pilipino ng digital health care na inlunsad ng kanyang kompanya sa panahong takot ang mga taong pumunta sa ospital para kumonsulta sa mga doktor dahil sa coronavirus pandemic.
Aniya, “Through a collaboration with trusted health experts, mWell will develop an ecosystem to bring integrated digital health care closer to every Filipino, even beyond the pandemic.
"mWell will empower every Filipino to be in control of their health with just one app."