Magkapatid ang ginagampanan nina Diego Loyzaga at Christian Bables sa Bekis On The Run, ang bagong drama-comedy movie ng direktor na si Joel Lamangan.
Hindi ordinaryong gay movie ang Bekis On The Run dahil tinatalakay nito ang mga katiwalian sa pamahalaan, ang mga closet gay sa military, at ang mga pro-gay rally na tatak Joel Lamangan.
Si Kylie Verzosa ang love interest ni Diego, at si Sean de Guzman ang gumaganap na karelasyon ni Christian sa pelikula.
Panggulat ang mga eksena nina Christian at Sean dahil sa kanilang mga naglalagablab na love scene.
Maton na maton ang palamurang karakter ni Diego, na carbon copy ng kanyang amang si Cesar Montano sa karamihan ng mga eksena niya.
Maraming beses nang gumanap si Christian na gay sa mga pelikula, pero tanging si Joel ang nakapagkumbinsi sa kanyang gawin ang torrid kissing at bed scenes nila ni Sean.
Nasanay na si Sean na pinaghuhubad sa lahat ng mga proyekto niya mula sa Anak Ng Macho Dancer, Lockdown, Nerisa, Taya, at pati na rito sa Bekis On The Run.
Muntik nang makatrabaho ni Christian si Joel sa Ang Huling Baklang Birhen sa Balat-Lupa, pero ipinalit sa kanya si Teejay Marquez dahil may conflict noon sa schedule niya.
Si Sean din ang kapareha ni Teejay sa upcoming gay movie ni Joel.
Si Lou Veloso ang adoptive gay mother ni Christian sa Bekis On The Run. Maipagmamalaki ng komedyante ang mapanghamong papel na importante sa kuwento ng pelikula na ipinagkatiwala sa kanya ni Joel.
Malalaki ang mga eksena sa Bekis On The Run kaya walang mag-aakalang inumpisahan at tinapos ni Joel ang shooting sa panahon ng pandemya.