Wala nang dapat ipag-alala ang mga taga-hanga at supporters ni Jennylyn Mercado.
Maayos na ang kanyang kalagayan matapos magkaroon ng medical emergency sa lock-in taping ng Love.Die.Repeat, ang upcoming drama series ng GMA-7 na pinagbibidahan nila ni Xian Lim.
Inilabas ngayong Sabado nang umaga ng manager ni Jennylyn na si Becky Aguila ang opisyal na pahayag nito sa kanyang Facebook page tungkol sa kasalukuyang sitwasyon ng 34-year-old actress.
Pinasalamatan din niya ang lahat ng mga nag-alala para sa kapakanan ni Jennylyn.
“First of all, we would like to express our gratitude to everyone who showed their concern over our artist, Jennylyn Mercado.
“We would like to assure the public that she is in good condition and in good health.
“On behalf of Jennylyn, we would like to thank GMA ETV Management, her Love Die Repeat co-stars as well as the whole production group for their understanding and support.”
Ngayong October 2 ang dapat na huling araw ng first cycle ng lock-in taping para sa Love.Die.Repeat pero na-pack up ito noong third week ng September dahil sa medical emergency kay Jennylyn.
Isang production insider ang nagsabing mabibigat ang mga eksena na kinunan at kukunan pa, pero higit na mahalaga ang kalusugan ni Jennylyn kaya inihinto ang trabaho ng lahat.
Hindi pa naglalabas ng pahayag ang GMA-7 Entertainment TV (ETV) management tungkol sa araw ng pagpapatuloy ng lock-in taping ng drama series na planong ipalabas sa first quarter ng 2022.