November 26, 2021 nang ibalita ng PEP.ph (Philippine Entertainment Portal) na magkakaroon ng Philippine adaptation ng Call My Agent!, ang French comedy-drama series na may French title na Dix pour cent (Ten Percent) at isa sa mga popular content sa Netflix.
Tuloy na tuloy na ang Filipino version ng Call My Agent! na ipo-produce ng Reality MM Studios nina Dondon Monteverde at Erik Matti.
Si Erik ang direktor ng proyektong pagbibidahan nina Angel Locsin at Edu Manzano.
Si Angel ang gaganap sa role ng lesbian talent agent na orihinal na ginampanan ng French actress na si Camille Cottin.
Si Edu ang magbibigay-buhay sa karakter ni Mathias Barneville, ang agent at isa sa mga partner ng talent management agency na namamahala sa acting career ng mga sikat na artistang may “star complex.” Una itong ginampanan ng French actor na si Thibault de Montalembert.
Tatlong beses nanalo ng acting award si Cottin para sa role nito sa Call My Agent! kaya malaking hamon at oportunidad kay Angel na siya ang pinili nina Dondon at Erik bilang bida ng Pinoy version ng sikat na programa.
France's Call My Agent! stars (from left) Thibault de Montalembert, Liliane Rovère, Camille Cottin, and Gregory Montel
Kakaiba ang konspeto ng Call My Agent! dahil ang mga artista ang gaganap sa kanilang mga sarili.
Sina Monica Belluci, Isabelle Huppert, Jean Reno, at Isabelle Adjani ang ilan sa mga sikat na French actor na gumanap sa sarili nila sa original version ng Call My Agent.
Meron nang Indian, Canadian, at Turkish version ang Call My Agent! na masusundan pa ng mga international remake dahil sa popularidad ng show sa mga manonood.
Pinaplano na ang pag-uumpisa ng shooting ng Pinoy version ng Call My Agent! sa April 2022. Kabilang ito sa mga proyekto na joint venture ng Reality MM Studios at HBO Asia.