London-based sa kasalukuyan si Bela Padilla pero tiniyak niyang babalik siya sa Pilipinas sa April 2022 para i-promote ang 366, ang pelikulang pinagbibidahan nila nina Zanjoe Marudo at JC Santos.
Debut movie niya rin ito bilang direktor.
Sa solo digital media conference para kay Bela na naganap ngayong Huwebes ng hapon, sinabi ng 30-year-old actress na masaya siya dahil sa magagandang pangyayaring hatid sa kanya ng 2022.
“I think this year, the universe really conspired for me to be happy and to be complete as a person. So, I was able to achieve so many firsts in my life, aside from 366, which is my directorial debut and first film na I guess talagang ang feeling ko I created.
“I was able to move to London, start a life here. I was able to figure out things I want for myself in the next few years, and I think malaking blessing siya kasi nagawa ko siya during the pandemic so I’m very thankful.
“Babalik ako ng April to promote 366 with Zanjoe Marudo and JC Santos. Pero for now, this is my home base, so babalik din ako dito after April,” saad ni Bela.
Hindi lamang ang promotions ng 366 ang pagkakaabalahan ni Bela sa pag-uwi nito sa Pilipinas sa Abril dahil tatapusin din niya ang kanyang mga eksena para sa Spellbound, ang pelikula nila ni Marco Gumabao na nahinto ang shooting noong March 2020.
“Kailangan ko mag-continue ng shoot ng Spellbound pag-uwi ko ng Pilipinas kasi naiwan namin siya, naabutan kami ng [coronavirus] pandemic nung nagsu-shoot kami ni Marco Gumabao, but I will do that in Manila in April,” sabi ni Bela.
LIFE IN LONDON
Ayon sa aktres, komportable siyang namumuhay na mag-isa sa London.
“I would say life is good at the moment. I’m enjoying London. I’m having fun here.
“Medyo back to basics po ako ngayon. Siyempre, wala akong kasama.
"Nawala lahat ng mga bagay na nagpapakomportable sa buhay ko sa Pilipinas, like wala akong kotse dito. Hindi ako marunong mag-drive sa right side ng kotse, so ayoko siyang subukan.
"Wala yung driver ko dito, wala yung assistant ko. So, back to basics po ako ngayon. Lahat ako muna ang gumagawa and I’m enjoying it.
"I have always been quite independent but I think this complete aloneness is new to me, but I’m liking it."
BELA'S BOYFRIEND AS JC'S STAND-IN
Kung naninirahan si Bela sa London, Zurich-based naman ang kanyang Swiss-Italian boyfriend na si Norman Bay. Pero nagkikita sila.
May special participation si Norman sa 366 dahil siya ang naging stand-in ni JC nang hindi makalipad ang aktor sa Istanbul, Turkey para sa shooting ng 366.
“Sinamahan niya akong maghanap ng location [sa Turkey]. And nung shoot po namin mismo, fun fact, hindi po lumabas yung passport ni JC in time for our shoot.
“May tickets na kami, ready na lahat. Nakagayak na lahat.
"Dapat kaming dalawa lang ni JC ang lilipad kasi yung buong crew for Turkey shoot were Turkish, so wala nang sumama sa akin from Manila."
Patuloy ni Bela, “Lahat ng likod shots ni JC sa Turkey ay pinatayo ko po si Norman or kung sinuman ang ka-height ni JC na nandoon at that time.
“May eksena sa 366 na likod ni Norman yung nakunan po namin. Magka-height sila at parehong kulot [ang buhok].
“Very happy po ako kasi hindi siya nagpabayad ng talent fee. Pro bono po yung cameo niya sa 366.”