Hindi malinaw kung nagbitaw ng salita noon ang broadcast journalist na si Karen Davila na lilipat siya sa ibang bansa kapag si Ferdinand Marcos Jr. ang mananalong bagong pangulo ng Pilipinas sa eleksyon noong May 9, 2022.
Pero muling naging biktima ng hate comments at tweets ang broadcast journalist at host ng Headstart ng ANC dahil sa panayam niya kay Senator Imee Marcos ngayong Miyerkules ng umaga, June 1.
Si Senator Imee ay nakatatandang kapatid ni President-elect Marcos Jr.
Maaliwalas ang mukha, masaya, at nakangiti si Karen nang ipakilala nito si Senator Imee bago nagsimula ang kanilang talakayan.
“Joining us this morning on Hot Copy, we have with us, this is gonna be a very colorful discussion. We have Senator Imee Marcos.
“Senator Marcos, good morning to you,” magiliw na bati at pagpupugay ni Karen sa senador.
Todo rin ang ngiti ni Senator Imee pero bakas ang sarcasm sa biro nito nang sagutin niya ang pagbati sa kanya ni Karen.
Aniya, “Yes, good morning Karen. It’s nice to see you you’re still here in the Philippines.”
“Well, first of all, congratulations,” reaksyon ni Karen, na hindi nawala ang ngiti sa labi at ang composure nang marinig niya ang sinabi ng senadora.
Pagpapatuloy ni Senator Imee, na hindi nawala ang mga ngiti sa labi, “Akala ko magma-migrate ka pag nanalo ang Marcos.”
Sagot ni Karen, na tila hindi naapektuhan sa sinabi ng senadora, “Hoping always for the best for the country,”
Sabi naman ni Senator Imee, “Thank you very much. We need that UniTeam.”
Ang UniTeam ay ang pangalan ng tandem ni Marcos Jr. at ni Vice-President-elect Sara Duterte.
Edited na ang pinag-uusapang unang bahagi ng talagang naging makulay na panayam ni Karen kay Senator.
Sa YouTube channel ng ANC, ito na ang mapapanood na introduction ni Karen sa umpisa ng video ng kanilang pag-uusap: “Senator, first, congratulations. Congratulations to your brother, to UniTeam and to you as well.”
Pero marami ang nag-record sa kontrobersiyal na biro ng senadora sa Headstart host na pinagpipistahan at pinagpapasa-pasahan ngayon sa social media.
At gaya ng inaasahan, ito ngayon ang ginagamit ng mga tagasuporta ni President-elect Marcos Jr. upang i-bash at kutyain ang veteran broadcaster na ginagawa lamang kanyang trabaho.