Biktima ng fake news ang Philippine Entertainment Portal (PEP.ph) at si Willie Revillame dahil ginamit ito sa artikulo tungkol sa Vitaman, isang uri ng gamot para sa prostatitis o prostate inflammation.
Lantaran at buong kapangahasang ginamit sa advertorial article ang logo ng PEP.ph, ang pangalan ng awtor na ito, at pinalabas na celebrity endorser ng produkto si Willie para makapanlinlang ng mga tao.
May headline ang artikulo na "Willie Revillame: Pinagaling ko ang prostatitis sa loob ng 2 linggo at ngayon ay nasisiyahan sa regular na pakikipagtalik sa aking batang asawa.Ibinahagi ko ang aking sikreto."
Screen grab ng pekeng artikulo na nag-eendorso ng isang vitamin
Nais iparating ni Willie at ng PEP.ph sa lahat na walang katotohanan o fake news ang lumabas na artikulong may layunin na manloko ng kapwa.
Ikinagulat ni Willie ang advertorial article na malinaw na fake news dahil walang karamdaman sa prostate ang host ng Wowowin: Tutok To Win.
Kailanman, hindi rin naglabas ang PEP.ph at ang awtor na ito ng report tungkol sa kapsula na isinusulong ng mga taong may masamang motibo, base sa artikulo na kanilang ikinalat.
Nais ng PEP.ph na bigyang-babala ang publiko tungkol sa fake advertorial article para hindi sila maging biktima ng disinformation at mga pekeng balita.
Isinangguni na ng PEP.ph sa legal counsel nito ang isyu ng panggagamit at panlilinlang ng pasimuno ng naglabas ng artikulo para mahinto na ang pagkalat nito.