Ang pangakong muling itatayo at magbabalik ang Annabel’s ang opisyal na pahayag ng management ng iconic restaurant sa Tomas Morato Avenue, Quezon City.
Ito ay matapos tupukin ng apoy ang Annabel's nitong Miyerkules ng umaga, August 31, 2022.
Nagpapasalamat ang management ng Annabel’s sa lahat ng mga taong nagpakita ng malasakit at nagdasal para sa kaligtasan ng restaurant at ng kanilang mga empleyado.
“Thank you for your concern and prayers.The fire is contained and no one was harmed during the incident. We’re happily looking forward to serving you.
“For now, we will rebuild to serve you better,” pahayag ng management ng Annabel’s.
Marami ang nalungkot, lalung-lalo na ang mga manggagawa mula sa entertainment industry, nang masunog ang restaurant na naghatid sa kanila ng magagandang alaala at malaking bahagi ng telebisyon at pelikula.
Walang major television networks at movie companies ang hindi nakaranas na magdaos ng mga press conference sa Annabel’s dahil sa mababait at maaasikasong mga tauhan.
Ang Annabel’s ang isa sa mga paborito ni Senator Bong Revilla Jr. kaya nang lumaya ito mula sa apat na taon na pagkakakulong sa Camp Crame, ang naturang restaurant ang kanyang pinuntahan.
Sa tuwing may mga presscon para sa mga pelikula ni Bong, ang Annabel’s ang venue dahil parang sariling tahanan na rin ito ng entertainment press.
Hindi lamang ang mga mahahalagang showbiz event ang idinaraos sa Annabel’s dahil piping saksi rin ang mga haligi at dingding nito sa mga kontrobersiyang kinasasangkutan ng mga sikat na personalidad.
Hindi kumakalat ang mga balita sa mga kontrobersiyal na nangyayari sa loob ng restaurant dahil mapagkakatiwalaan ang kanilang mga empleyado.
"Na-immortalize" naman ang Annabel’s dahil sa mga eksena sa mga pelikula na kinunan sa nasabing restaurant.
Patio Esperanza ang dating pangalan ng Annabel’s, na pinangyarihan ng hindi malilimutang "You’re nothing but a second rate trying hard copycat" iconic confrontation scene nina Cherie Gil at Sharon Cuneta sa 1985 movie na Bituing Walang Ningning.
Ang Annabel’s, Mario’s, at Alfredo’s ang tatlo sa mga restaurant sa Tomas Morato area na makasaysayan at malapit sa puso ng entertainment industry.
Marami ang nalungkot dahil makalipas ang limang dekada, nagsara ang Alfredo’s noong July 2022.
Muling naramdaman ang pagkalumbay nang masunog ngayong Miyerkules ang Annabel’s.
12-HOUR MONITORING
Ikinabahala naman ng writer at businessman na si Wilson Flores ang nangyari sa Annabel’s dahil nasunog noong 2018 ang bakery at restaurant na pag-aari niya, ang makasaysayan ding Kamuning Bakery.
Halos pareho ang nangyari sa Annabel’s at Kamuning Bakery kaya base sa kanyang karanasan, may mungkahi si Wilson para sa lahat, pati na sa mga tauhan ng Bureau of Fire Protection—bantayan sa loob ng labindalawang oras ang mga nasunog na establishment bago ito tuluyang iwan at magdeklara ng fire out.
Saad niya, “Beware of recurring fires, ask firemen or fire dept. never totally abandon a fire site for next 12 hours, because I Googled that embers of fires could reignite again if oxygen or air just touches embers...
“It is sad to hear that Quezon City's famous Annabel’s Restaurant has just been hit by fire twice this morning... First time 4 am in the morning & reportedly fire out said the firemen by 5:30 am... Then again at 8 or 8:30 am the fire reportedly ignited again...
“I think the Annabelle resto 2 times fire this morning, this was also what happened to now 83-year-old Kamuning Bakery Cafe in 2018.
“A fire had started around 4 pm at next door neighbor the former M-Bar resto bar which the fire department had later declared as 'fire out,' however past midnight at reportedly 3 am or 4 am strong winds had ignited the fire again from this neighbor & which then hit, engulfed the whole bakery...”