Ngayon ang unang Pasko na hindi kapiling ni Senator Grace Poe at ng pamilya niya ang kanyang ina, ang Queen of Philippine Movies na si Susan Roces.
Pumanaw si Susan noong May 20, 2022 sa edad na 80.
Sa mensahe ni Poe para sa sambayanang Pilipino sa araw ng pagsilang ni Hesus Kristo, hindi niya nakaligtaan na banggitin ang kanyang namayapa na ina.
"Unang Pasko ito na hindi namin makakasama ang aking ina. Bagamat malungkot at nangungulila kami sa kanya, kasama ng aking pamilya ay nananatili ang kanyang alaala sa aming puso ngayong Pasko," ang bahagi ng pagbati ni Poe.
Ginugunita rin ngayon ng senadora ang anibersaryo ng pag-iisang-dibdib ng kanyang mga magulang.
Limampu’t apat na taon (54) na ang nakalilipas buhat nang idaos sa Santuario de San Jose sa Greenhills East Village sa Mandaluyong City, noong December 25, 1968, ang itinuring na Wedding of the Year ni Susan at ng King of Philippine Movies na si Fernando Poe, Jr. o FPJ.
Ang Fashion Czar of Asia na si Pitoy Moreno ang madaliang gumawa ng damit pang-kasal ni Susan (na agaw-pansin ang kakaiba na hairdo sa araw ng kanyang kasal) nang pakasalan ito ni FPJ sa simbahan.
Malaking balita ang kasalan nina FPJ at Susan na dalawa sa pinakasikat na artista noon.
Ang noo'y President Ferdinand Marcos Sr. at First Lady Imelda Marcos ang nanguna sa listahan ng mga ninong at ninang.
Ang church wedding nina Susan at FPJ ang pangalawang beses na pagpapakasal nila.
Una silang kinasal noong December 18, 1968 nang magtanan sila at ikinasal ni Mayor Gerry Angeles ng Valenzuela, Bulacan.
Dinumog ng mga tagahanga ang Santuario de San Jose dahil sa kanilang masidhing kagustuhan na masaksihan nang personal ang kasalan ng taon, at malinaw ito na mapapanood sa digitally restored video ng wedding of the year na ibinahagi ng pamangkin ni Susan na si Jeffrey Sonora noong 2017.
Ang FPJ Studios ang namahala sa restoration ng wedding video nina Susan at FPJ na isa na lamang alaala, pero malaking bahagi ng kasaysayan ng industriya ng pelikulang Pilipino, at maaari na paulit-ulit na panoorin dahil sa bisa ng makabago na teknolohiya.
MORE HOT STORIES ON PEP.PH:
- Vhong Navarro celebrates Christmas with family weeks after posting one-million-peso bail
- Charo at Malou Santos spotted with GMA-7 execs; Tambalang Jodi Sta. Maria-Richard Yap, kasado na?
- Anatomy of A History Teleserye: "Noli yarn?" How GMA-7's hit teleserye Maria Clara at Ibarra came about
- (Updated) Vice Ganda, KathNiel, Beauty Gonzalez spotted at Eraserheads reunion concert