Makalipas ang ilang taong hindi pagkikita dahil sa coronavirus pandemic, muling nagkasama ang original Regal Babies na sina Maricel Soriano at Snooky Serna, at si Regal Films producer Mother Lily Monteverde.
Nangyari ang pagkikita nila sa Valencia Events Place, Valencia Street, Quezon City, nitong Sabado ng tanghali, January 7, 2022.
Si Mother Lily ang may ideya na imbitahan sa isang tanghalian ang Dabarkads, ang grupo nila na kinabibilangan ng mga talent manager na sina Dolor Guevarra, June Rufino, Shirley Kuan, Veana Fores, at Girlie Rodis; Senator Grace Poe; Lawrence Tan; Roselle Monteverde; Maricel; at mga anak ni Dolor na sina Jaypee at Anes.
Hindi miyembro ng Dabarkads si Snooky, pero si Maricel ang nagsama sa kanya sa naganap na tanghalian.
Labis itong ikinatuwa ni Mother Lily dahil matagal na nitong hindi nakikita ang mga aktres na inalagaan at pinasikat niya nang husto noong dekada ‘80 bilang Regal Babies.
Malaki ang utang na loob na tinatanaw nina Snooky at Maricel mula kay Mother Lily dahil ito ang nagtiwala sa kanilang mga kakayahan bilang aktres noong mga teenager pa lamang sila.
Ikinuwento nina Maricel at Snooky sa isang episode ng YouTube vlog nito noong December 2022 na nami-miss nila ang pagiging mapagmahal at pagtili sa kanila ni Mother Lily.
Pahayag ni Snooky, “Nakaka-miss na in the sense na authentic, e. Sa kanya lang yun galing.
"Saka yung pagka-dual personality ni Mother na one minute, galit na galit, tapos mamayang konti may kausap na siya sa telepono [sa malambing na tono], ‘Hello, yes... kumusta na?'"
“Ganoon lang si Mother pero loving talaga siya,” sabi ni Maricel, na natatawang pinatotohanan ang mga kuwentong lumilipad ang mga telepono [landline] na sinasalo nila kapag nagagalit noon si Mother.
Ang nangyaring reunion nina Mother Lily, Snooky, at Maricel nitong Sabado ang bihirang pagkakataong lumabas ng bahay ang Regal matriarch.
Buhat nang magkaroon ng pandemya, hindi na pinapayagan ng kanyang mga anak si Mother Lily na umalis ng bahay kaya hindi siya dumalo sa Christmas party ng Regal Entertainment Inc. para sa kanilang mga empleyado at contract stars noong December 12, 2022.