Wala si Ella Cruz sa media conference ng Martyr or Murderer na ginanap noong February 9, 2023 sa Podium Hall, Pasig City dahil bumiyahe siya sa South Korea, kasama ang kanyang boyfriend na si Julian Trono.
Tatlong buwan na mawawala sina Ella at Julian sa Pilipinas dahil magiging abala sila sa kanilang recording at training sa South Korea na dahilan din kaya parehong hindi aktibo ang dalawa sa social media.
Nataon sa press conference ng Martyr or Murderer ang pag-alis ni Ella patungo sa South Korea kaya hindi na siya nakadalo sa press conference ng pelikula na mapapanood sa mga sinehan simula sa March 1, 2023.
Si Ella ang gumanap na Irene Marcos sa Maid in Malacañang, ang unang installment sa tatlong pelikula ng direktor na si Darryl Yap tungkol umano sa buhay ng pamilya Marcos, matapos mapaalis sa puwesto si dating Pangulo Ferdinand Marcos dahil sa EDSA Revolution noong February 1986.
Naging kontrobersyal at maingay ang partisipasyon ni Ella sa Maid in Malacañang dahil sa kanyang pahayag noong July 2022 na, “History is like tsismis. It is filtered and dagdag na rin, so hindi natin alam what is the real history.
"Andoon na yung idea pero may mga bias talaga. As long as we’re here alive at may kanya-kanyang opinion, I respect everyone’s opinion."
Dahil sa kanyang paghahalintulad sa "tsismis" at "kasaysayan," inulan siya ng hate comments at pinutakti ng mga basher na kontrang-kontra sa paniniwala niya.
- Ella Cruz draws flak for calling history "tsismis"; Xian Gaza posts open letter to her
- Ella Cruz, nakiusap sa bashers na huwag idamay ang kanyang pamilya sa isyung kinasasangkutan
Ngayong 2023, nakaligtas si Ella sa mga kritiko ni Yap at ng Martyr or Murderer dahil hindi nga siya dumalo sa media conference ng pelikula.
Naiwasan niya na magbitiw ng mga salita na puwedeng maging rason muli para mag-alburoto ang mga tao na hindi sang-ayon sa kanyang paniniwala.