Kung hindi pa sumablay ang host ng Miss World Universe International 2023 sa pag-aanunisyo ng nanalo, hindi malalaman ng mga Pinoy na may patimpalak para sa mga kakabaihan at mga kalalakihang pinakyaw na ang lahat ng pangalan ng mga prestigious international pageant—ang Miss World, Miss Universe, at Miss International.
Ang kandidata ng Myanmar ang idineklarang winner ng host sa grand coronation na ginanap sa Ho Chi Minh City, Vietnam, Biyernes ng gabi, May 26, 2023.
Nang matanto ng host ang kanyang pagkakamali, humingi agad siya ng paumanhin.
“I’m sorry! I’m sorry. I’m sorry.
"It’s my fault, it’s my fault. It’s my fault because in my hand when I was reading first runner-up.
"The first runner-up, I’m sorry two beautiful lady…
"The first runner-up is Miss Myanmar so it means the grand winner si Miss Philippines,” pagtutuwid ng emcee sa kanyang kapalpakan.
Ang "Miss Philippines" na tinutukoy ng host ay si Hannah Grace Navales, na siyang tunay na nanalong Miss World Universe International 2023.
Popular search ngayon sa social media ang host ng pageant dahil inihalintulad siya sa pagkakamali ng American host na si Steve Harvey nang ianunsiyo nito ang nanalo sa Miss Universe 2015.
Read: Miss Universe 2015 host Steve Harvey apologizes for "honest mistake" in announcing the winner
May dapat ipagpasalamat ang organizers ng Miss and Mr. World Universe International sa nagkamali na host dahil ito ang naging instrumento para magkaroon ng kamalayan ang publikong may umiiral palang pageant na humakot at gumamit sa titulong World, Universe, at International.
Hindi lamang si Hannah Grace Navales ang nanalong Miss World Universe International 2023, dahil nagwagi naman sa male division ng contest si Joshua Azares ng Capiz, ang hinirang na Mr. World Universe International 2023.
Ang manager ni Joshua na si Mark Kevin Balbona ang nagbigay ng impormasyong 23 years old na si Joshua at nakatakda silang bumalik sa Pilipinas bukas, Linggo, May 28.
