Hindi lamang si Sarah Geronimo ang babae sa buhay ngayon ni Matteo Guidicelli na nagsisimula sa letrang "S" ang pangalan—kundi pati na si Susan Enriquez.
Pumatok sa Unang Hirit viewers ang "San-G" tandem nina Susan at Matteo kaya ang segment nila sa early morning program ng GMA-7 ang isa sa mga inaabangan.
Magkasama sina Susan at Matteo na bumisita sa Daraga, Albay, ngayong Martes ng umaga, June 20, 2023, dahil binisita nila sa isang evacuation center ang ating mga kababayang apektado ng pag-aalburoto ng Mayon Volcano.
Reservist si Matteo ng Philippine Army at sa tulong ng mga miyembro nito, namahagi sila ni Susan ng mga pagkain at relief goods sa mga kababayan nating lumikas mula sa kanilang mga tahanan para makaiwas sa pinsalang maaaring idulot ng pagsabog ng bulkan.
Bago bumiyahe sa Albay ang dalawa, pinuntahan ni Matteo at ng misis nitong si Sarah Geronimo ang Hacienda Balustre Cerca ni Susan sa Indang, Cavite, noong Linggo, June 18.
Iniidolo ni Susan si Sarah kaya masayang-masaya siya nang makilala niya nang personal ang singer-actress.
"Ang akala ko nga mga Kapuso, best friends na kami ni Tita Susan. Pero nung nandoon na ako, wala nang pakialam sa akin. Kay Sarah na lang!" natatawang kuwento ni Matteo.
Ibinida ni Matteo na natikman niya sa farm ni Susan ang pinakamasarap na itlog na maalat at gandang-ganda siya sa hacienda ng kanyang Unang Hirit partner.
“Sobrang ganda tapos Airbnb pa. Napakaganda ng mga kuwarto. Dapat mag-outing tayong lahat doon," imbitasyon ni Matteo na kumportableng-komportable na sa bagong pamilya niya sa Unang Hirit.