“G na Gitle [Genuine na Legit] Dehins Gedtali [Hindi Tagilid]" ang bago at pinag-uusapang Instagram post ni Joey de Leon ngayong Linggo ng gabi, August 20, 2023.
Palaisipan sa mga tagasubaybay ni Joey ang naging mitsa para muling magpatutsada ang controversial co-host ng E.A.T., ang noontime variety program ng TV5.
Naniniwala ang mga tagasuporta ni Joey na may insidente o isyu na nag-udyok sa kanya para ibahagi sa lahat ang cryptic post na ginamit niyang caption sa larawan ng lahat ng mga host ng E.A.T..
May mga nag-iisip na baka si former Manila City Mayor Isko Moreno, na may sariling segment sa Eat Bulaga! na "G sa Gedli," ang pinatutungkulan ng Instagram post ng comedian at TV host na tinaguriang "Henyo Master."
Si Isko ang isa sa mga ipinalit bilang co-host ng Eat Bulaga! at ang "G sa Gedli" ang kanyang public service segment na namimigay ng pera sa mga taobf nakakasalamuha nila ni Buboy Villar sa mga lugar na kanilang pinupuntahan.
Kung may "G sa Gedli" ang Eat Bulaga!, may "Sugod Bahay Mga Kapatid!" ang E.A.T. na version nila ng "Juan for All, All for Juan," isa sa mga dating public service segment ng TV program na pinanggalingan nina Joey, Tito, at Vic Sotto.
Maingay at inaabangan ang "Sugod Bahay Mga Kapatid!" mula nang mag-umpisa itong mapanood sa E.A.T. dahil sa popularidad ni Mayor Jose Manalo, ang karakter ni Jose Manalo na isinalarawan bilang ang "Mayor na walang talo dahil ipinanganak na Manalo."
Ang "Sugod Bahay Mga Kapatid" at si Mayor Jose Manalo ang isa sa mga dahilan ng mataas na ratings ng E.A.T. dahil kinaaaliwan nang husto ng televiewers.
Pinaniniwalaan ng mga mahihilig sa intriga na sinadyang itapat ng E.A.T. si Mayor Jose Manalo kay Isko na dating mayor ng Maynila at malakas din ang "G sa Gedli" segment sa Eat Bulaga!.