Pinaghahandaan na ni Pops Fernandez ang major concert niya sa February 2024 kaya muling napag-usapan ang "Concert Queen of the Philippines" title na ipinagkaloob sa kanya noong dekada ’80.
Nang itanong ng Cabinet Files kung nakarehistro sa pangalan niya ang nabanggit na titulo...
“Dapat ba? Huwag mo nang ikuwento, baka may mauna pa,” ang natatawa na reaksyon ni Pops na tumatanaw ng utang na loob mula kay Inday Badiday, ang kinikilala na "Queen of Intrigues" na namayapa noong September 2003.
“Hindi ko alam ang mga bagay na yan. Again, ang nagbigay kasi niyan sa akin, si Ate Luds [Inday Badiday]. Thank you to Ate Luds and it got stuck.
“And back then, of course, I am deeply, deeply honored to be called a 'queen,' but hindi ko naman yan sineryoso in my mind because I felt I could do better.
“I wanna do more, I want to better myself, and until now, gusto ko mas ma-hone ko pa ang craft ko.
“But I’m always deeply grateful because ever since then, nauso yung mga title. So maaga pa lang, in my career, nabigyan na ako ng title. So maraming salamat,” ani Pops na nagulat dahil hindi nito inaasahan na makikilala siya bilang concert performer.
“Parang mas nakilala kasi ako as concert performer. Again, it’s something I didn’t expect…never really thought about it.
“Hosting, yes. Acting, yes. Singing, yes pero performing in a huge venue, concert-wise, hindi ko ine-expect iyon.
“Sometimes, yung unexpected things, yun pa ang magiging strength mo. Dun ka makikilala.”
Apat na dekada na ang showbiz career ni Pops pero dalawampung taon muna ang nakalipas bago niya natuklasan ang kalayaan at karapatan na magdesisyon para sa kanyang professional life.
“In our business kasi, are we ever satisfied? Parang hindi, e, di ba? We always want to do something more and we always want to better and improve ourselves.
“Now, I get to decide, choose. Dati kasi nung bata ako, parang ang feeling ko, everybody chose for me and everybody plan for me.
“About twenty years ago, na-realize ko na, ‘Oh, I have a voice and I can plan pala and I can decide on my own.' So I think that was also a turnaround for me personally and career-wise, noong mag-umpisa na akong mag-decide.
“Dati kasi, takot na takot akong mag-decide for myself. Puwede naman pala,” ang rebelasyon ng singer-actress at host ng For the Love, ang Saturday afternoon drama anthology ng TV5 at Viva Television.
May mga pagkakataon na pansamantalang tinalikuran ni Pops ang showbiz dahil sa mga personal na dahilan, pero bumabalik siya sa industriya na naging mabuti sa kanya kaya lubos ang pasasalamat niya.
“Feeling blessed din ako diyan. Mabait ang lahat sa akin. Dati kasi mahiyain ako so akala ng mga tao, suplada ako.
“Actually, mahiyain ako noon. Aaminin ko, hindi ako sure sa sarili ko. So it came out as makasarili ako, suplada.
“Ang totoo noon is hindi lang ako sure sa sarili ko. Ano ba ang dapat kong sabihin? Ano ba ang dapat kong gawin? Ang dami kong takot and once I eventually came out of my shell, ako rin na-discover ko yung sarili ko.
“Yung strength ko, kung ano ba yung puwede at dapat kong sabihin. Slowly but surely, I gained my confidence but it took a long time. It took a long time for that to happen.
“Inaamin ko na hindi naman ako perfect, hindi naman ako ganoon kagaling. So marami akong natututunan every time I work with people.”