Ngayong Sabado, Disyembre 16, 2023 ang ika-90 na taon na kapanganakan ng Philippine movie queen at nirerespetong aktres na si Gloria Romero.
Ipinagdiwang ni Romero ang kanyang kaarawan sa Sampaguita Events Place sa Sampaguita Studios compound sa Valencia Street, Quezon City, noong Biyernes nang gabi, Disyembre 15, 2023.
Bago nagsimula ang kasiyahan, isang banal na misa na pinangunahan ni Fr. Dave Concepcion ang idinaos na dinaluhan ng pamilya, mga kaibigan, at kasamahan sa industriya ng beteranang aktres.
Ang selebrasyon ng ika-90 na kaarawan ni Gloria ang unang pagkakataon na muli siyang nasilayan ng publiko matapos ang coronavirus pandemic na nag-umpisa noong Marso 2020.
“It was so moving and intimate. She kept crying,” ang pahayag sa Cabinet Files ni Rica Maceda, isa sa mga bisita at nagmamahal kay Gloria na nasaksihan ang buong pangyayari.
Sa edad na 90, glamorosang-glamorosa pa rin ang aktres na binansagang First Lady of Philippine Cinema at ito ang napansin ng lahat ng mga bisita.
Madamdamin ang muling pagtuntong ni Gloria sa Sampaguita compound dahil dito nagsimula noong 1951 ang acting career niya at ang katuparan ng kanyang mga pangarap.
Sina Boots Anson Roa-Rodrigo, Barbara Perez, Marita Zobel, Daisy Romualdez, Pepito Rodriguez, Helen Gamboa, Celia Rodriguez, Imelda Ilanan, Liza Lorena, Ricky Davao, Gina Alajar, Butch Francisco, Ciara Sotto, at Harlene Bautista ang ilan sa mga personalidad na dumalo sa importanteng araw ni Gloria na maligayang-maligaya dahil nakapiling niya ang kanyang mga kaibigan at mga mahal sa buhay.
Isang dance medley ang inihandog kay Gloria ng kanyang anak na si Maritess at apo na si Chris Gutierrez.
Inalayan din siya ni Maritess ng awit, ang "Through The Years" samantalang ang medley ng "Maalala Mo Kaya," "Hindi Kita Malimot," at "Dahil Sa ’Yo" ang kinanta ng tatlong anak na lalaki ni Marichu Vera Perez-Maceda.
Matalik na kaibigan ni Gloria, si Marichu o kilala sa showbiz bilang Manay Ichu na producer ng Sampaguita Pictures, at isa sa mga haligi ng industriya ng pelikulang Pilipino na pumanaw naman noong Setyembre 7, 2020.