Maligayang-maligaya si Mark Anthony Fernandez dahil pinupuri ng mga film critic at ng manonood ang kanyang husay sa pag-arte sa Para Kang Papa Mo, ang reunion movie nila ng kapwa niya Guwaping members na sina Eric Fructuoso at Jao Mapa.
“I’m glad na na-entertain namin sila, nabigyan ng magandang drama at komedya. Nagpapasalamat ako sa naging reaksyon nila. Sana, lalo pa namin silang ma-entertain in the future,” ang pahayag ni Mark sa eksklusibong pakikipag-usap sa kanya ng Cabinet Files.
Hindi lamang ang mahusay na pagganap ni Mark sa Para Kang Papa Mo ang napansin dahil tumanggap din ng mga papuri ang character actress na si Ruby Ruiz at si Darryl Yap, ang sumulat ng kuwento at direktor ng pelikula na nagpatawa at nagpaiyak sa mga nanood.
“I’m super happy. Naging fan ako at kinilig dahil nakatrabaho ko si Tita Ruby Ruiz. Ang galing niya,” ani Mark na pinasalamatan si Yap dahil ipinagkatiwala nito sa kanya ang lead role sa pelikula na ibinuhos niya ang lahat ng kakayahan sa pag-arte.
“Nagpapasalamat din ako sa Hashtags at sa mga nanood dahil napansin nila ang obra namin. Maraming salamat sa magagandang komento.”
Exclusive contract si Mark ng Viva Artists Agency (VAA), ang talent management arm ng Viva Entertainment.
Sa lahat ng contract star ng VAA, si Mark ang pinakaabala at hindi nawalan ng trabaho ngayong 2023 dahil labing-isa ang mga ginawa niya na proyekto, kabilang ang mga pelikula sa Viva Films, Vivamax at television series.
“Sobrang nagpapasalamat ako sa Viva Films at sa sining ng Pilipinas,” ang sabi ni Mark na mapapanood sa television adaptation ng Lumuhod Ka Sa Lupa, isa sa mga blockbuster action-drama movie noong 1986 ng kanyang pumanaw na ama na si Rudy Fernandez.
Hindi makapaniwala si Mark na makalipas ang tatlumpu’t pitong taon, isa siya sa mga artistang magkakaroon ng partisipasyon sa television remake ng pelikula ng tatay niya na ipinalabas sa mga sinehan noong August 2, 986.