Mahaba ang pila ng mga tao sa mga sinehan ng Gateway Mall 1 at Gateway Mall 2 Cineplex sa ikalawang araw ng 49th Metro Manila Film Festival (MMFF) ngayong Martes, Disyembre 26, 2023.
Labingwalo (18) na ang mga sinehan sa Gateway Mall 1 & 2 dahil isinabay sa pag-uumpisa ng 49th MMFF noong Lunes, Disyembre 25, ang pagbubukas sa anim na mga bagong sinehan ng Gateway Mall 2.
Kaya mula sa Gateway Cineplex 10, Gateway Cineplex 18 na ang tawag sa naturang lugar.
Hindi pa inihahayag ng Gateway Mall management kung kailan bubuksan ang dalawang mga bagong sinehan sa Gateway 2 na nananatili pang sarado.
Hindi pa ganap na alam ng publiko na bukas na ang mga bagong sinehan sa Gateway Mall 2 kaya nagsisiksikan ang lahat sa pagpila sa mga lumang sinehan ng Gateway Mall 1.
Mapapanood sa Gateway Mall 1 and Gateway Mall 2 cinemas ang sampung pelikulang kalahok sa 49th MMFF pero magkakaiba ang presyo ng tickets.
Sa Gateway Cineplex 2, pinakamahal ang tickets para sa Rewind dahil nagkakahalaga ito ng P413.
Samantalang P403 ang ticket prices para sa Becky & Badette, Family of Two, Firefly, GomBurZa, at Mallari.
Mas mura ang presyo ng tickets para sa mga pelikulang palabas sa Gateway Mall Cineplex 1.
P393 ang halaga ng tickets para sa Rewind, samantalang P383 ang ticket prices ng Penduko, Becky & Badette, Broken Hearts Trip, Family of Two, Firefly, When I Met You In Tokyo, Kampon, Mallari, at GomBurZa.
Lumilitaw na mas mahal manood sa mga sinehan ng Gateway Mall 2 dahil bago ito, pero palaisipan ang presyo ng tickets para sa Rewind na mas mataas ng sampung piso kaya nangangailangan ang publiko ng paliwanag mula sa mga kinauukulan tungkol sa hindi magkakaparehas na halaga ng kanilang binabayaran.