Unang napabalita na ipalalabas sa Netflix noong Setyembre 2020 ang Barber’s Tales na pinagbibidahan ni Eugene Domingo pero hindi natuloy ang streaming ng nabanggit na pelikula.
Makalipas ang apat na taon, nag-umpisa nang mapanood sa Netflix noong Biyernes, Enero 12, 2024, ang Barber’s Tales na may Tagalog na pamagat na Mga Kuwentong Barbero at mula sa panulat at direksyon ni Jun Robles Lana.
Agosto 13, 2014, unang ipinalabas sa mga sinehan sa Pilipinas ang pelikulang ito na nagkaroon pa ng world premiere sa Tokyo International Film Festival, kunsaan nanalong best actress si Eugene.
Ito ang kauna-unahang international award ni Uge dahil sa kanyang mahusay na pagganap.
Kung hindi pa ipinalabas sa Netflix ang Barber’s Tales, hindi malalaman at mapapansin ng mga Pilipino na maganda ang pelikula.
Tungkol ito sa mga karahasan na nagaganap noong 1975 sa panahon ng Batas-Militar sa ilalim ng pamumuno ng dating pangulo ng Pilipinas na si Ferdinand Marcos, Sr.
Hindi lamang si Eugene ang nagpamalas ng husay sa Barber’s Tales dahil magagaling din ang kanyang co-stars na sina Eddie Garcia, Daniel Fernando, Gladys Reyes, Iza Calzado, Nonie Buencamino, Nicco Manalo, Shamaine Buencamino, at maging si Nora Aunor na may maiksing partisipasyon sa pelikula.
Bago pa nag-umpisa ang Netflix streaming ng Barber’s Tales, mahigit isang taon na itong napapanood sa YouTube channel ng Shutter Philippines pero hindi nga masyadong pinagtuunan ng pansin.
Ngayon, puring-puri na ng mga Pilipino ang kagandahan ng obra-maestra ni Lana.
Marilou ang pangalan ng karakter ni Eugene sa Barber’s Tales dahil alay ni Lana sa kanyang mentor na si Direk Marilou Diaz-Abaya (March 30, 1955 - October 8, 2012) ang pelikula.
Si Lana ang nagsulat ng award-winning movies ni Abaya na Sa Pusod ng Dagat (1998), Muro-Ami (1999), Jose Rizal (1998), at Bagong Buwan (2001).
Ginawaran ng parangal na National Artist for Film and Broadcast Arts si Abaya nung 2022.