May sagot ang Kapuso singer na si Anthony Rosaldo sa mga taong nagtataka dahil sa mga mamahalin na bags at alahas na koleksyon niya na nakikita sa kanyang mga social media account.
Sa eksklusibong panayam ng Cabinet Files, sinabi ni Anthony na nagkaroon siya ng hilig na mangolekta ng luxury bags, sapatos at alahas nang magsimula ang coronavirus pandemic noong Marso 2020 at dahil sa panonood niya ng mga Hollywood movie.
“Nahilig ako nitong pandemic. I’ve been watching a lot of Hollywood films and got curious sa mga gamit ng celebs so it started with just one bag worth P120,000 tapos ayun, tuluy-tuloy na.
“It’s when I go out of the country or I accomplished something, bumibili ako ng luxury bags and shoes.
“I have a collection of bags, pinakamarami ang Louis Vuitton. The most expensive bag I have is worth P200,000.
Anthony Rosaldo with a Louis Vuitton shopping bag and an lV Outdoor Messenger, which retails a little less than USD2,000 or about PHP105,000.
Anthony and his LV Takeoff Backpack, which has a price ranging from PHP150,000 to PHP235,000 for the pre-loved versions on online shops, such as Farfetch.com.
Anthony with his Loewe puzzle bag.
Anthony in a Fendi blazer.
“I also have jewelries. Meron akong Cartier jewelry at Rolex watch,” ang pahayag ni Anthony na may depensa tungkol sa nakahiligan niya na pagbili ng mga mamahaling gamit.
“Ang masasabi ko lang is, I work hard so deserve ko naman siguro to have what I want! Hehehe!” ang natawang sabi ni Anthony na natutuwa dahil naipagpatayo nito ng bahay noong nakaraang taon ang kanyang ina, isa sa mga itinuturing niya na pinakamalaki na investment.
Hindi itinanggi ni Anthony na nakakatanggap siya ng mga indecent proposal pero hindi niya binibigyan ng pansin.
Aniya, “Malimit akong nakakatanggap [ng indecent proposals] lalo sa mga messages online but it’s okay. Di ko na lang sinasagot yung mga message.”
Bibihira ang nakakaalam na nagsimula sa edad na apat at bilang child actor ang showbiz career ni Anthony sa Puso ng Pasko, ang pelikulang opisyal na kalahok sa 24th Metro Manila Film Festival noong December 1998.
Napansin naman ang husay ni Anthony sa pagkanta nang sumali siya sa unang season ng The Clash at mula noon, nagtuluy-tuloy na ang kanyang singing at acting career.
“My biggest achievement siguro is when I got the lead role in Ang Huling El Bimbo,” ang kuwento ni Anthony na may hindi malilimutan na karanasan sa isang pagtatanghal nila.
“There was one run that I forgot to wear my boxer shorts. So there’s a scene na need ko magtanggal ng pants and ayun, naka-brief lang ako!
“Tuloy pa rin ang show but I was scared na mapagalitan ako pero nagtatawanan lang sila sa backstage.”
Ang solo concert niya na Switch na itatanghal sa Music Museum sa Enero 31, 2024 at ang kanyang nalalapit na pagbibida sa rock musical na Rent ang dalawa sa mga proyekto na pinaghahandaan ni Anthony na maligaya sa mga nangyayari ngayon sa kanyang entertainment career.
“I chose Switch as the title of my first solo concert because of my biggest switch last year when I did my first theater musical which is Ang Huling El Bimbo where I played young Hector.
“I’ve been learning my songs for Switch since December when we announced the concert.
“Abangan ninyo rin po ang Broadway musical na pagbibidahan ko, ang Rent because I’ll be playing Roger, the lead role.”