Ang 50th anniversary ng Metro Manila Film Festival (MMFF) sa Disyember 25, 2024 ang pinaghahandaan ng Film Development Council of the Philippines.
Isa ito sa mga dahilan kaya hindi idaraos ang Summer Metro Manila Film Festival, pati na ang Pista ng Pelikulang Pilipino (PPP).
Read: Walang Summer MMFF at Pista ng Pelikulang Pilipino ngayong 2024
Ang direktor at FDCP Technical Consultant na si Joey Reyes ang nagbigay ng paliwanag na madaling mauunawaan ng lahat tungkol sa desisyon na huwag idaos ngayong taon ang mga nabanggit na film festival.
"Gusto ng MMDA, ibalik yung PPP kasi walang Summer Festival because we’re preparing for the golden MMFF, but we cannot afford.
"We don’t have the manpower and the money. May movies daw na hindi nakapasok noong December, but no budget. Wala kaming pera," ang prangkang rebelasyon ni Reyes.
Inilahad naman ni FDCP Chair Tirso Cruz III ang kanyang saloobin na may kaugnayan pa rin sa hindi pagdaraos ng Summer MMFF at PPP.
Aniya, "At the rate we are going, kapag nagdagdag pa tayo ng festival, wala nang nanonood ng festival dati, dadagdagan mo pa ng isang festival?
"E, di magtutulo lang ang laway nung mga tao.
"Pero alam ninyo, iba itong pinag-uusapan natin. Nakakasama ng loob, pero kapag tiningnan mo, andiyan pa rin lahat. Nakaabang lahat dahil gusto pa rin talaga natin na buhayin ang pelikulang Pilipino.
"Everyone is trying to scrounge and everyone is looking for ways on being able to uplift Philippine movies.
"Buhayin ulit talaga because once upon a time, we were there, so it means kaya nating gawin ulit yon.
"It’s just a matter of working together, finding ways nga of working it out."
Noong January 10, una nang ipinaliwanag sa isang official statement ng FDCP na binawasan ang budget nito.
Nakasaad din na pinili ng FDCP na suportahan at palakasin ang existing film festivals sa bansa kaysa mag-organisa ng sariling film festival.
FDCP'S FREE FILM SHOWING INITIATIVE
Humarap sina Cruz at Reyes sa mga miyembro ng entertainment media noong Huwebes, Pebrero 15, dahil inilahad nila ang mga bagong proyekto ng FDCP para sa unang quarter ng 2024.
Kabilang dito ang Sine Sinta: Pag-Ibig at Pelikula, na nag-umpisa noong Pebrero 16 at matatapos sa Pebrero 23, 2024.
Libre ang pagtatanghal ng Filipino classic at contemporary romance films sa Trinoma Cinema, Metropolitan Theater, FDCP Cinematheque Centres at JuanFlix, at FDCP Channel sa YouTube.
Kabilang sa mga mapapanood sa Sine Sinta: Pag-Ibig at Pelikula ang One More Chance, Kita Kita, Giliw Ko, Radio Romance, Love You to the Stars and Back, Isa Pa with Feelings, I’m Drunk I Love You at That Thing Called Tadhana.
Read: FDCP officials Tirso Cruz III, Joey Reyes react to separate awards night of MIFF