Tig-isang milyong piso ang premyo na tinanggap ng mga nagwagi sa grand finals at awarding ceremony ng Young Creatives Challenge (YC2) na ginanap noong Marso 21, 2024 sa Samsung Hall ng SM Aura, Taguig City.
Proyekto ng Department of Trade and Industry (DTI) ang YC2, alinsunod sa Republic Act 11904, na kilala rin bilang Philippine Creatives Industries Development Act (PCIDA), para mapalakas ang sustainability at mapalago ang creative industries sa pamamagitan ng Malikhaing Pinoy Program.
Bukod sa P1,000,000 monetary reward, tumanggap ng tulong mula sa DTI ang grand winners ng Songwriting, Playwriting, Graphic Novel, Animation, at Game Development para sa pagpaparehistro ng kanilang intellectual property at pagsusulong sa mga nagwaging trabaho nila sa produksyon o commercial release.
Kalahating milyong piso, P300,000 at P100,000 ang premyo na ipinagkaloob sa first runner-up, second runner-up, at third runner-up, respectively, para sa iba’t ibang kategorya ng patimpalak.
Kinilala ng DTI ang kahalagahan ng paglikha ng online content dahil ginawaran nila ng P30,000 na premyo ang pinakamahusay na nilalaman ng TikTok na nagtataguyod sa YC2.
Ito ang kumpletong listahan ng mga nanalo sa limangdaan at pitumpo’t siyam (579) na kalahok mula sa iba’t ibang panig ng bansa na sumali sa YC2.
Songwriting: “Lambing” by Rocky (Surigao City, Surigao del Norte)
Screenwriting (Short Film): Fishing the Moon Out of Water by John Peter Chua (Quezon City)
Screenwriting (Full-Length Film): Bugkos: End of Childhood by Breech Asher Harani (Compostela, Davao de Oro)
Playwriting: Ang Pagbuo ng Baliana by Esmeralda Albis (Minalabac, Camarines Sur)
Graphic Novel: The Girl and the Tamaraw by AJRAVII (Quezon City)
Animation: Ang Kampanilya by Meeproduction (Makati City)
Game Development: “High Times” by YYM Danni (Manila City)
Online Content Creation: Rose Ann Factolerin Espina and Kirby Jay Factolerin Caragan (Cebu City).
Mga nagsilbing hurado sa Songwriting sina Noel Cabangon, Kedy Sanchez, Jimmy Antiporda, Jake Lanting at Virginia Bactad.
Samantalang ang mga direktor na sina Joey Reyes, Roni Benaid, at ang mga manunulat na sina Suzette Doctolero, RJ Nuevas, at Niña de Castro ang screenwriting jury.
Sina Congressman Toff de Venecia, Timothy Dacanay, Dominique Garde-Torres, Jonathan Tadioan, at Mariane Detera ang mga hurado sa Playwriting category.
Sina Jon Zamar, Andrea Pasion-Flores, Jack Lord Suson, at Hank Kanalz ang mga hurado sa Graphic Novel.
Sina Marlyn Montano, Marla Rausch, Francisco Santos Jr., Grace Dimaranan, at Patrick Astilla naman ang judges sa Animation.
Habang sa Game Development naman ay sina Alvin Juban, Sharleen Sy, Andro Baluyut, Alexis Geronga, at Ryan Taclan ang mga pumili ng mga nanalo para sa kategoryang ito.