May mahigpit na paalaala si Willie Revillame sa publiko na nagsasadya sa TV5 studio sa Novaliches, Quezon City, para manood ng Wil To Win at sumali sa game segments ng kanyang programa.
Babala niya: Mag-ingat sa mga scammer na nag-aabang ng bibiktimahin sa labas ng TV5 studio.
Read: Willie Revillame, nag-trending ulit dahil sa Family Feud viewer
Mismong si Willie ang nakatuklas sa krimeng ginagawa ng scammers nang mamukhaan niya ang isang babaeng minsan nang sumali at nanalo sa "Cookie to Win" segment ng Wil To Win at gusto uling lumahok sa palaro.
“Huy, nanood ka na dati, ah. Naglaro na ito dati, nanalo na. Umamin ka sa akin,” sabi ni Willie sa female studio audience.
Umamin ang female studio audience na sumali na siya at dati nang nagwagi sa "Cookie to Win."
Pero jacket lamang daw at hindi PHP2,000 na napanalunan niya ang ibinigay ng taong nag-recruit sa kanya sa labas ng TV5 studio.
Inilahad ng babae na hindi niya kilala ang taong lumapit sa kanya at pinagsuot ng Wil To Win T-shirt para makapasok siya sa loob ng studio at makalahok sa game segment ng programa ni Willie.
Read: Willie, itinangging hanggang December 2024 na lang ang Wil To Win
WILLIE REVILLAME WARNS STUDIO AUDIENCE AND VIEWERS
Dismayadong sabi ni Willie: “Yan ang sinasabi ko. So, hinugot siya. Ibig sabihin, kinuha lang siya sa labas.
“Marami ho talaga ang walanghiya diyan sa labas ng studio. Niloloko kayo kaya kawawa kayo.
"Nagpapasok ho ng mga tao dito [sa studio]. Kapag nananalo, kinukuha ang pera, kaya huwag kayong papayag na dadagdagan ang [grupo] ninyo.”
Dagag pa ng TV host, “Hindi ninyo ako puwedeng dayain dahil nakikita ko, natatandaan ko.”
Hindi ito ang unang pagkakataong natuklasan ni Willie na may scammers na bumibiktima sa mga inosenteng tao na nagsasadya sa studio ng kanyang programa.
Noong napapanood pa si Willie sa Wowowin ng GMA-7, siya rin ang nakadiskubre sa scammers na niloloko at pinagkakakitaan ng pera ang mga pumipila sa harap ng Studio 6 ng Kapuso Network.