May sagot si dismissed Bamban, Tarlac mayor Alice Guo tungkol sa viral photo nitong naka-peace sign habang napapagitnaan siya ng mga nakangiti ring sina DILG Secretary Benjamin Abalos Jr. at PNP chief General Rommel Marbil.
Kuha ang larawan matapos mahuli si Guo sa Jakarta, Indonesia, noong Huwebes, Setyembre 5, 2024.
Read: Alice Guo, mistulang artista matapos maaresto sa Indonesia
Nagmistulang celebrity si Guo sa mga selfie photo na kuha sa Jakarta, kasama ang ibang mga empleyado ng pamahalaan ng Pilipinas na sumundo sa kanya.
Ikinagalit ito ng maraming Pilipino na naniniwalang binigyan siya ng special treatment.
“Kaya po ako naka-smile po, yun po ang para sa akin po na pinaka-language ko po sa family, sa mga tao po na nagmamahal po sa akin na okay po ako,” paliwanag ni Guo sa hearing ng Senate Committees on Women, Children, Family Relations and Gender Equality, Migrant Workers, Public Order, and Dangerous Drug ngayong Lunes, Setyembre 9.
Magkakatulong na iniimbestigahan ng dalawang komite ang ginawang pagpuslit sa Pilipinas at pagtatago sa Indonesia ni Guo.
SENATORS FLARE UP AT ALICE GUO'S ANSWERS
Hindi nagustuhan ni Senator Joel Villanueva ang sagot ni Guo, na tinatawag niya sa Chinese name nitong Guo Hua Ping pero nanindigan ang dating alkalde ng Bamban, Tarlac, na Alice Guo ang kanyang pangalan at isa siyang Pilipino.
Nayayamot na reaksiyon ni Villanueva: “I am not even asking that first answer that you’re talking about, that it’s a sign to whoever your fanbase is.
“My only question is why didn’t you go straight to PNP Chief and SILG [Secretary of Interior and Local Government]? Why didn’t you ask for police help because, at the end of the day, ganoon din pala yung gagawin mo.
“Ang sabi mo, dun ka, you feel safe. Pero hindi, e. Tumakas ka, iniwanan mo kami. Binastos mo kami. Binastos mo yung buong gobyerno. Hinalughog ka sa buong Pilipinas.
“Ang mga kapulisan natin, mga NBI, coastguards, talagang pinahirapan mo.
"Pero sasabihin mo ngayon, may death threat ka. Ngayon kampante ka na protected ka. It doesn’t make sense kasi, Guo Hua Ping,” ani Villanueva.
Hindi lamang si Villanueva ang nanggigil at halos maubos ang pasensiya sa diumano’y pagsisinungaling ni Guo, na inakusahang pinaglalaruan ang senado
Halos naubos din ang pasensiya ng lahat ng mga senador na nagtatanong sa kanya na kinabibilangan nina Loren Legarda, Koko Pimentel, Raffy Tulfo, JV Ejercito, Bong Revilla Jr., Bato dela Rosa, Sherwin Gatchalian, at Jinggoy Estrada.
CITED IN CONTEMPT
Si Senator Risa Hontiveros ang chairperson ng Committee on Women, Children, Family Relations and Gender Quality.
Kahit napipikon na rin si Hontiveros, malumanay ang kanyang boses nang i-contempt niya si Guo.
“I move to cite Guo Hua Ping, also known as Alice Guo, in contempt of the senate for testifying falsely and evasively before this committee.
“With the motion duly seconded by Senator JV Ejercito and Senator Joel Villanueva, you are hereby cited in contempt.
"You will remain in the custody of the senate until the conclusion of this committee’s inquiry or until you finally recognize the authority of this body and grant the semblance of respect for the laws of this country.
“The committee will coordinate with any court ordering your detention pero rerespetuhin mo ang senado.”
APOLLO QUIBOLOY DURING PNP PRESS BRIEFING
Habang ginaganap ang imbestigasyon ng Senado tungkol sa pagpuslit sa Pilipinas ni Alice Guo, isang press briefing naman ang idinaos sa Camp Crame, Quezon City, ngayong Lunes din ng hapon, Setyembre 9, 2024.
Iniharap ng Philippine National Police (PNP) at Department of Interior and Local Government (DILG), sa pangunguna ni Secretary Benjamin Abalos Jr., sa mga miyembro ng media si Kingdom of Jesus Christ founder Pastor Apollo Quiboloy at ang mga kasamahan ito.
Matagal nagtago si Quiboloy sa batas bago ito dinakip sa Davao City, noong Linggo, Setyembre 8.
Read: Apollo Quiboloy "surrendered" to ISAFP following 24-hour ultimatum from PNP
Umalma ang ibang netizens sa paraan ng paghaharap sa mga akusado sa publiko dahil hindi makikita ang kanilang mga mukha.
Hindi nakilala ang mga akusado, lalo na si Quiboloy na gumamit ng face mask, dark shades, scarf sa kanyang leeg at baseball cap na may tatak na Agila.
Isang malaking palaisipan sa karamihan ng mga Pilipino ang pagpayag ng PNP at DILG na magtakip ng mukha ang mga sangkot sa mga kaso ng fraud, conspiracy, sex trafficking of child, at marami pang iba.
CHITO ROÑO ON GUO AND APOLLO
Ang pag-aresto kina Guo at Quiboloy ang mga balitang sinusubaybayan ngayon ng mga Pilipino.
Kabilang ang veteran at award-winning director na si Chito Roño sa mga kilalang personalidad na hindi nakapagpigil magkomento tungkol sa kanyang mga nasasaksihang eksena sa social media.
Pahayag ng direktor: “Is it just me or piniprito lang mga senator sa sariling mantika? Parang linalaro-laro lang sila ng mga fugitives?"
“Gusto ko lang ma-recreate ang movie na Chicago, mahu-hurt si Alice Guo dahil mas sumikat pa si Apollo at super ignored siya.”
Ito rin ang sentimiyento ng maraming Pilipino dahil mahahalata sa mga sagot at pagsisinungaling ni Guo na pinaglalaruan nito ang mga senador, na nagtimpi nang husto sa pakikipag-usap sa kanya pero may ilan sa kanila na hindi na nakapagpigil.