Ang maalab na love scene nina Lovi Poe at Jameson Blake sa Guilty Pleasure ang isa sa mga dapat umanong abangan sa pelikula ng Regal Entertainment Inc.na mapapanood sa mga sinehan simula sa Oktubre 16, 2024.
Pero may isyu sa intimate scene ng lead stars ng Guilty Pleasure dahil, ayon sa isang production insider, hindi gumamit si Jameson ng plaster para matakpan ang pribadong bahagi ng kanyang katawan.
Nang kunan ang eksena sa bahay ng dating aktres na si Ruby Rodriguez sa Teacher’s Village, Quezon City, inalis lamang ni Jameson ang nakatapis na tuwalya kaya makikita ang kabuuan ng kanyang makinis, maputi, at hubad na katawan.
Read: Lovi Poe, nahihiya pa ring tawaging "Hollywood actress"
JAMESON BLAKE'S VERSION
Iba ang bersiyon ng kuwento ni Jameson nang makausap siya ng Cabinet Files sa Regal Legacy, ang pagdiriwang ng 60th anniversary ng Regal Entertainment na ginanap sa Valencia Events Place, Quezon City, noong Sabado, Setyembre 21.
“Oo. Gumamit ako ng tissue at saka plaster,” may katiyakang pahayag ng mestisong aktor nang tanungin tungkol sa paggamit niya ng plaster sa sizzling love scene nila ni Lovi.
Nang balikan ng Cabinet Files ang production insider para usisain tungkol sa magkaibang sagot nila ni Jameson, iginiit niyang walang budget para sa plaster ang produksiyon kaya paano raw nangyari ang sinabi ng aktor.
Idinagdag pa ng production insider na kung gumamit si Jameson ng plaster sa eksena nitong kasama si Lovi, tiyak na mapapansin nila.
Read: Jameson Blake admitting he used to do drugs: “I’m done with that. I learned a lot.”
Gumamit man ng plaster o hindi sa love scene nila ni Lovi, hinahangaan ng production team ng Guilty Pleasure ang professionalism na ipinakita ni Jameson sa shooting ng pelikulang pinagbibidahan din ni JM de Guzman.
Co-production venture ng Regal Entertainment at ng C’est Lovi Productions ang Guilty Pleasure.
Itinatag ni Lovi ang C’est Lovi Productions dahil sa kagustuhan niya na maihatid at maibahagi sa international audience ang mga kuwento mula sa Pilipinas at ang husay ng mga artistang Pilipino.
Read: Dalawang pelikula ni Lovi Poe, kabilang sa upcoming projects ng Regal Entertainment