Natuklasan ang green bones sa mga labi ng pumanaw na aktres at dating Pagsanjan, Laguna mayor na si Girlie "Maita" Ejercito, matapos ang kanyang cremation sa Arlington Memorial Chapels, Araneta Avenue, Quezon City, ngayong Linggo, Nobyembre 10, 2024.
Kilala rin sa showbiz si Girlie bilang Maita Sanchez.
Ipinaliwanag ng isang empleyado ng Arlington Memorial Chapels sa mga naulila ni Maita ang kahulugan ng green bones na pinaniniwalaang taglay ng mga mabubuting tao.
Itinuturing ding simbolo ng suwerte at naghahatid ng kasaganaan sa sinumang magdadala sa kanilang pag-iingat ng green bones.
Binawian ni buhay si Maita dahil sa endometrial cancer, sa St. Luke’s Medical Center, Quezon City, noong Nobyembre 3. Siya ay 55.
Read: Former Pagsanjan mayor and actress Maita Sanchez dies at 55
Pinatunayan ng mga nakakakilala kay Girlie ang kabutihan nito noong nabubuhay pa kaya hindi na sila nagtaka nang makita nila ang green bones ng namayapang aktres.
FUNERAL PROCESSION FOR MAYOR MAITA
Ibinurol si Maita sa ancestral house ng mga Ejercito sa Pagsanjan, Laguna.
Noong Sabado, Nobyembre 9, nagkaroon ng funeral procession sa bayang pinaglingkuran niya bilang alkalde (Hunyo 30, 2010 - Hunyo 30, 2019) at bise-alkalde (Hunyo 30, 2019 – Hunyo 30, 2022).
Nakalinya sa kalsada ang mga taong nagbigay-pugay kay Maita sa huling pagkakataon at nagpasalamat para sa serbisyong ibinigay niya sa bayan at mamamayan ng Pagsanjan.
Isang misa ang idinaos sa Our Lady of Guadalupe Parish Church bago dinala ang kanyang mga labi sa Arlington Memorial Chapels para sa cremation na nangyari nitong Linggo, Nobyembre 10.
Read: ER Ejercito, idinetalye ang mga huling sandali ni Maita Sanchez
Nang dumaan ang sasakyang maghahatid kay Maita sa Arlington Memorial Chapels sa makasaysayang arko ng Pagsanjan noong Sabado, isang water salute ang ibinigay sa kanya ng Bureau of Fire Protection ng Pagsanjan bilang pagpupugay kay Maita.
Ang asawa ni Maita, ang aktor at former Laguna Governor na si ER Ejercito, at ang kanilang anim na anak ang naghatid sa kanya sa Arlington Memorial Chapels.
Nakitaan din ng berdeng buto ang mga abo ng multi-awarded actress na si Jaclyn Jose nang i-cremate ang bangkay nito noong Marso 2, 2024.