Sina Francine Diaz at Seth Fedelin ang kinabukasan ng Philippine cinema.
Pinatunayan nila ito sa kanilang pelikulang My Future You, official entry sa 50th Metro Manila Film Festival (MMFF), na mula sa panulat at direksiyon ni Crisanto Aquino.
Naganap ang red-carpet premiere ng My Future You sa SM Megamall Cinema.
Lumabas na masaya at nakangiti mula sa loob ng sinehan ang lahat ng mga nanood na puring-puri ang launching movie ng loveteam nina Seth at Francine.
Read: Francine, "nagwala" nang makasama sa MMFF 2024 ang My Future You
DARK HORSE
Ang My Future You ang isa sa mga itinuturing na dark horse sa MMFF 2024 dahil wala pang napatutunayan sa box-office sina Seth at Francine.
Pero inaasahang lilikha ng ingay ang kanilang pelikula sa Gabi ng Parangal na mangyayari sa Disyembre 27.
Napakahusay ni Seth sa karakter na ginampanan nito.
Malaki ang kanyang tsansang magkaroon ng nominasyon at manalo sa kategoryang best actor dahil sa napakanatural na pag-arte niya.
Napakalaki ng laban ni Seth sa ibang mga award-winning at veteran actors na may filmfest entry at hinuhulaang magwawagi.
Rebelasyon si Francine sa unang pelikula nila ni Seth dahil nakipagsabayan siya kay Seth sa pagalingan sa pag-arte.
Malakas ang tilian sa loob ng sinehan dahil sa mga hindi pilit pero nakakakilig na mga eksena nina Seth at Francine.
Read: MMFF 2024: Star power, plus factor sa pagpili ng official entries
DIREK CRISANTO AQUINO
Kakaiba ang kuwento ng My Future You dahil nagbibigay ito ng mga mahahalagang aral sa buhay.
Walang mga kontrabida at walang mga eksenang bayolente kaya masayang lalabas mula sa mga sinehan ang mga nagbabalak manood.
Pulido at maganda ang pagkakagawa ng My Future You dahil sa mahusay na direksiyon ni Crisanto Aquino, na nagawang itawid ang pambihirang kuwento ng kanyang pelikula.
Si Crisanto ang direktor ng mga pelikulang Write About You at Instant Daddy. Noon pa man, ipinakita niya ang galing bilang storyteller.
Siya rin ang direktor ng Relyebo, ang Vivamax movie na critically-acclaimed dahil pa rin sa kanyang mahusay na direksiyon.
Ang Regal Entertainment, Inc. ang producer ng My Future You.
Sa isang pagtitipon, nabanggit ng producer na si Roselle Monteverde na kakaunti pa lamang ang mga sinehang pagtatanghalan ng kanyang pelikula.
Walang dapat ipag-alala si Roselle dahil tiyak na madaragdagan ang bilang ng mga sinehan ng My Future You kapag kumalat ang balitang napakaganda ng pelikulang handog ng Regal Entertainment at opisyal na kalahok sa 50th Metro Manila Film Festival.
Read: Francine Diaz at Seth Fedelin, ayaw makumpara sa KathNiel