Malungkot na sinalubong ng mamamayan ng Cabugao, Ilocos Sur, ang pagdating sa kanilang bayan ng bangkay ni Department of Agriculture Undersecretary Deogracias Victor “ DV” Savellano.
Si Savellano ang asawa ng multi-awarded actress na si Dina Bonnevie.
Read: Politician DV Savellano, husband of Dina Bonnevie, dies
Sakay ng isang helicopter, iniuwi ni Dina ang mga labi ng kanyang asawa sa bayan nito ngayong Linggo ng umaga, Enero 12, 2025.
Sumalubong at nagbigay-pugay sa pumanaw na undersecretary ang mga opisyal at miyembro ng pulis ng Ilocos Sur.
Binawian ng buhay si Savellano sa Makati Medical Center dahil sa abdominal aneurysm noong Enero 7, 2025.
Siya ay 65.
Ibinurol ang mga labi ni Savellano sa Aeternitas Chapels & Columbarium, Commonwealth Avenue, Quezon City, mula Enero 8 hanggang Enero 11 bago siya dinala ngayon sa Cabugao, Ilocos Sur.
Ibuburol ang mga labi ni Savellano sa kanilang tahanan sa Cabugao.
Nakatakda siyang ilibing sa Cabugao Cemetery sa Enero 17, 2025.
DV SAVELLANO COMES HOME TO ILOCOS SUR
Mahal na mahal si Savellano ng kanyang mga kababayan na matagal niyang pinagsilbihan bilang gobernador at bise-gobernador ng Ilocos Sur.
Naging House Representative din siya ng unang distrito ng Ilocos Sur at vice-mayor ng Cabugao.
Marami sa mga kasamahan ni Dina sa entertainment industry ang nakiramay sa aktres na nabiyuda, dalawampung araw bago ang kanyang kaarawan sa Enero 27.
Ngayong Linggo, Enero 12, ang kaarawan ng anak ni Dina na si Oyo Sotto, ang araw ring iniuwi sa Cabugao, Ilocos Sur, ang mga labi ng kanyang namayapang asawa.