Hindi tooong kabilang si Willie Revillame sa senatorial lineup ng Alyansa Para Sa Bagong Pilipinas dahil sa kumakalat na larawan nila ni House Speaker Martin Romualdez.
Luma na ang nasabing larawan.
Kuha umano ito noon pang Setyembre 2023 nang dalawin ni Willie ang kanyang mga kaibigang sina Richard Gomez at Sam Verzosa sa Kongreso.
Dahil sa paglitaw ng lumang litrato nila ni Romualdez, marami ang nag-akalang kabilang na si Willie sa mga senatorial candidate ng administrasyon ni President Ferdinand Marcos Jr.
Sa panayam ng Cabinet Files, nilinaw ni Willie na nananatili siyang independent candidate at hindi kaanib ng anumang political party.
Read: Ang tunay na istorya sa viral video ni Willie Revillame at ng PWD
CAMPAIGN MOTORCADES OF WILLIE AND MANNY
Samantala, noong Huwebes, Marso 27, 2025, nagkasalubong ang campaign motorcades ni Willie at ng Pambansang Kamao na si Manny Pacquiao sa Caloocan City.
Si Pacquiao ay kabilang sa senatorial lineup ng Alyansa Para Sa Bagong Pilipinas.
Kasama ni Willie sa motorcade ang re-electionist na si Senator Bong Go, na tumatakbo naman sa ilalim ng Partido Demokratikong Pilipino (PDP).
Nang makasalubong nina Willie ang motorcade ni Pacquiao at ng asawa nitong si Jinkee Pacquiao, nagsigawan ang mga tao ng “Duterte! Duterte!”
Habang sumisigaw ng “Duterte!” ang mga taong saksi sa nagkasalubong na motorcade nina Pacquiao at Willie, “Pahingi ng jacket!’ naman ang isinisigaw ng staff ng Pambansang Kamao sa Wil to Win host.
Naging trademark ni Willie ang pamimigay ng jacket sa kanyang TV show, at ipinagpapatuloy niya ito sa kampanya.
Hindi naman nabigo ang mga kasama ni Pacquiao dahil binigyan sila, pati na si Manny, ng mga jacket at T-shirt.
“Senator Manny Pacquiao, bigyan ng jacket yan! Bigyan ng jacket si Ma’am Jinkee! Bigyan ng jacket ang mga Pacquiao!” natatawang sabi ni Willie habang binibigyan ng jacket ang mag-asawang Pacquiao.
Read: Lino Cayetano, mala-telenobela ang congressional bid
Incidentally, ngayong Biyernes, Marso 28, ang ika-80 kaarawan ni dating Pangulong Rodrigo Duterte.
Isang araw bago ang kaarawan ng dating Pangulo, lumabas ang music video ni Willie na may pamagat na "Puso Para sa Bayan."
Kalakip nito ang mensahe niya kay Duterte: "Maligayang Kaarawan Mahal na Pangulo. Ipinagdadasal po namin kayo."
Read: Arjo Atayde, emotional sa kanyang State of the District Address
Notice: This article falls under promotional material for a candidate running in the 2025 election.