Patuloy na dinidinig sa Sanchez Mira Regional Trial Court sa Cagayan Province ang kasong syndicated estafa laban sa aktor na si Ricardo Cepeda.
Ang kasong syndicated estafa ay isinampa ng mga investor ng isang sales company laban kay Ricardo.
Walong buwan na ang nakararaan buhat nang makalaya si Ricardo mula sa halos isang taon na pagkabilanggo sa Cagayan Provincial Jail, sa Tuguegarao, matapos payagang maghain ng piyansa noong Setyembre 2024.
Hindi pa bumabalik si Ricardo sa Sanchez Mira Regional Trial Court dahil tanging ang kanyang legal counsel ang kinakailangang dumalo sa mga pagdinig sa kaso niya.
Naninindigan si Ricardo na wrongfully accused siya.
Read: Ricardo Cepeda: from incarceration to prison release
RICARDO CEPEDA GIVES UPDATE ABOUT HIS CASE
Sa panayam ng Cabinet Files, ibinahagi ni Ricardo na pabor sa kanya ang balitang inihatid tungkol sa mga bagong pangyayari sa kasong kinasasangkutan.
“The update is that it’s still going positively for me,” umpisang pahayag ni Ricardo.
“Hearings have been one a month, except nung April dahil na-cancel.
“One witness only each time. Same story that doesn’t point at me.
"Complainants and witnesses admit that I never talked with them about their investment. That we never even met personally."
Ayon pa sa aktor: “I am not required to attend [the hearing]. Just my lawyer.
"Prosecution has nothing to ask me as wala nga akong interaction with complainants."
Read: Ricardo Cepeda released after posting bail for estafa case
Nadawit si Richard sa kaso dahil siya ang celebrity ambassador ng sales company na tinutugis ng mga investor.
Dinakip si Ricardo sa Caloocan City noong Oktubre 7, 2023, at ikinulong sa Camp Karingal, Quezon City.
Noong Nobyembre 29, 2023, inilipat siya sa Cagayan Provincial Jail.
Nang dakpin si Ricardo, hindi umano niya natanggap ang warrant of arrest pero may nakatatak na “served” sa dokumento.
“Hindi ko man lang alam na may warrant. Na-served ang warrant na hindi ako ang tumanggap,” sabi ni Ricardo.
Kumpiyansa rin ang aktor na mapapawalang-sala siya dahil inosente umano siya sa mabigat na paratang na ibinibintang laban sa kanya.