Sina Janno Gibbs, Heaven Peralejo, at ang direktor na si Mikhail Red ang ilan sa Filipino celebrities na nagwagi sa 2nd Jinseo Arigato International Film Festival (JAIFF).
Naganap ang pamamahagi ng parangal ng JAIIF sa Menicon Theater sa Nagoya, Japan, noong Linggo, Mayo 25, 2025.
Personal itong dinaluhan ng Viva artists na sina Janno at Heaven, at ng Viva resident director na si Mikhail.
Read: Alfred Vargas, nagwaging best actor sa isang filmfest sa Japan
Si Janno ay itinanghal na Best Director for Comedy para sa pelikula niyang Itutumba Ka ng Tatay Ko.
Si Mikhail naman ay nagwaging Best Director for Suspense Thriller Horror para sa Lilim.
Si Heaven ay nanalong Best Actress for Suspense Thriller Horror category dahil sa kanyang pagganap sa Lilim.
“Thank you to the Jinseo Arigato International Film Festival for this incredible honor. To be recognized for something I love with all my heart—it means the world,” bahagi ng mensahe ng pasasalamat ni Heaven para sa karangalang iginawad sa kanya ng JAIFF.
WHAT IS JINSEO ARIGATO FILM FESTIVAL?
Mga pelikula mula sa Pilipinas, Singapore,Thailand, USA, at Nepal ang kalahok sa 2nd JAIFF.
Pero walang ibang detalye tungkol sa international film festival na nag-umpisa noong 2024.
Kabilang sa mga Pilipinong pinarangalan noong 2024 ay si Ana Jalandoni, na itinanghal na Most Promising Actress.
Maliban sa pagkakaroon ng Facebook page na binuksan noong Enero 15, 2024 at meron nang 11,000 followers, walang ibang mapagkukunan ng mga impormasyon tungkol sa JAIFF.
Wala itong official website kaya wala rin detalye tungkol sa mga organizer ng international film festival na malaki ang suporta sa industriya ng pelikulang Pilipino at sa Filipino entertainers.
Sa inaugural ng JAIFF noong nakaraang taon, kabilang sina Alden Richards, Bianca Umali, Kiray Celis, Ana Jalandoni, at Sanya Lopez sa mga tumanggap ng parangal.
Ang namayapang Superstar at National Artist for Film and Broadcast Arts na si Nora Aunor ang ginawaran ng “Hall of Fame” International Actress award.