Pumanaw na si Al-Waleed bin Khaled bin Talal Al Saud, ang prinsipe ng Saudi Arabia na binansagang Sleeping Prince, nitong Sabado, July 19, 2025.
Siya ay 36.
Dalawampung taon na-coma ang prinsipe.
Hindi na nagkaroon ng malay si Prince Al-Waleed dahil sa car accident na naganap nang nag-aaral siya sa isang military college sa London noong 2005, at nagdulot ng matinding pinsala sa kanyang utak.
Kinse anyos lamang noon ang prinsipe.
Binawian ng buhay si Prince Al-Waleed sa King Abdulaziz Medical City, Riyadh, ang naging tahanan niya sa loob ng dalawang dekada.
Dalawampung taong nabuhay ang prinsipe sa tulong ng ventilator, pero hindi na nagising kaya nakilala siya bilang Sleeping Prince.
Read: CEO na nahuli-cam sa concert ng Coldplay, nag-resign sa trabaho
THE SLEEPING PRINCE
Si Prince Al-Waleed ang panganay na anak ni Prince Khaled bin Talal Al Saud.
Tumanggi noon si Prince Khaled na alisin sa life support ang kanyang anak.
Ipinalipat ni Prince Khaled si Prince Al-Waleed sa isang specialized medical facility dahil hindi siya nawalan ng pag-asang darating ang araw na magkakaroon ng malay ang kanyang anak.
Pero makaraan ang dalawang dekada, mapayapang sumakabilang-buhay ang Sleeping Prince.
Kinumpirma ni Prince Khaled ang pagpanaw ng kanyang anak sa pamamagitan ng kanyang post sa X (dating Twitter).
Nakasaad dito: “O reassured soul, Return to your Lord, well-pleased and pleasing [to Him], And enter among My [righteous] servants, And enter My Paradise.
“With hearts believing in Allah will and decree, and with deep sorrow and sadness, we mourn our beloved son: Prince Al-Waleed bin Khaled bin Talal bin Abdulaziz Al Saud, may Allah have mercy on him, who passed away today.’"
Nakatakdang ilibing si Prince Al-Waleed ngayong Linggo, Hulyo 20, 2025.