Sarado mula Agosto 31, 2025 hanggang Setyembre 19, 2025 ang Frozen Ever After, isa sa mga ride attraction sa Hong Kong Disneyland Resort.
"Due to operational adjustments" ang sinabing dahilan ng Hong Kong Disneyland Resort management tungkol sa pansamantalang pagsasara sa Frozen Ever After.
Pero pinaniniwalaang may kinalaman rito ang pagkamatay ng isang turistang Pilipino noong Biyernes, Agosto 29.
Hindi pinangalanan ang turista na 53 ang edad na nawalan ng malay habang nakasakay sa Frozen Ever After slow-moving ride.
Agad na inalerto ng misis ng nasawi ang mga tauhan ng Disneyland tungkol sa nangyari sa kanyang asawa na may hypertension at sampung taon nang may karamdaman sa puso.
Nagsagawa ng cardiopulmonary resuscitation (CPR) ang mga first responder bago nila dinala sa North Lantau Hospital ang pasyenteng tuluyan nang binawian ng buhay.
Sa pahayag na ibinigay ng Hong Kong Disneyland management, tiniyak nila na walang kinalaman sa kaligtasan ng pagsakay sa Frozen Ever After ang pagkamatay ng lalake.
"The resort deeply regrets the passing of the guest and will do its utmost to provide necessary assistance to his family.
"Our initial investigation has shown the incident is not related to ride safety," ang paglilinaw ng tagapagsalita ng Hong Kong Disneyland.
Kinumpirma ng Philippine Consulate General sa Hong Kong ang malungkot na pangyayari, at nakikipag-ugnayan na ang kanilang tanggapan sa mga kinauukulan para maiuwi sa Pilipinas ang mga labi ng sumakabilang-buhay na Pinoy na turista.